جب دنیا کی مرغوب اور پسندیدہ چیزیں ختم ہونے والی ہیں تو اللہ تعالیٰ نے ان سے بہتر چیزوں کے بارے میں آگاہ کرتے ہوئے فرمایا:
15- اے رسول! کہہ دیں: کیا میں تمھیں ان مرغوباتِ دنیا سے بہتر کی خبر نہ دوں؟ ان لوگوں کے لیے جنتیں ہیں جو اللہ کی اطاعت کرکے اور اس کے منع کیے ہوئے کاموں سے بچ کر اس سے ڈرتے ہیں۔ ایسی جنتیں جن کے محلات اور درختوں کے نیچے نہریں چلتی ہیں۔ وہ ان میں ہمیشہ رہیں گے۔ نہ انھیں موت آئے گی اور نہ فنا ہوں گے۔ ان جنتوں میں ان کے لیے ہر تخلیقی اور اخلاقی برائی سے پاک صاف ستھری بیویاں ہوں گی اور اس سب کچھ کے ساتھ ان کے لیے اللہ تعالیٰ کی رضا مندی ہو گی کہ وہ کبھی ان سے ناراض نہ ہو گا اور اللہ اپنے بندوں کے حالات خوب دیکھنے والا ہے۔ ان کے حالات میں سے کوئی چیز اس سے پوشیدہ نہیں اور وہ انھیں اس کا ضرور بدلہ دے گا۔