79. Surah An-Naazi'aat

روز قیامت کی مشکلات۔ (ف 5) دنیا کے موجودات کے ذکر کے بعد قیامت کا ذکر فرمایا تاکہ معلوم ہوجائے کہ یہ موجودات ہمیشہ رہنے والی چیزیں نہیں ہیں بلکہ یہ سب موجودات ایک دن اجڑ کر اس کے بعد سزا وجزا کا دوسرا انتظام قائم ہوگا جس کا نام قیامت ہے۔ الطامہ اس آفت کو کہتے ہیں جس کی برداشت نہ ہوسکے، یہاں الطامہ سے مطلب قیامت ہے ، اس دن دوزخ کو لوگوں کی آنکھوں کے سامنے لایاجائے گا، سورج ایک میل کے فاصلہ کی بلندی پر آجائے گا ادھر سے سورج کی گرمی اورادھر دوزخ کی گرمی، اس لیے پسینہ کی وہ حالت ہوگی کہ ہوش و حواس ٹھکانے نہ رہیں گے نیکی وبدی کے تولے جانے کا، پل صراط پر گذرنے کا جداخوف لگا ہوگا، غرض ایسی ایسی خوفناک آفتیں اس دن آدمی کو پیش آئیں گی جس کی برداشت اس قدر مشکل ہے جو اللہ نے خود فرمایا، والساعۃ ادھی وامر۔ جس کا مطلب یہ ہے کہ قیامت کی گھڑی بڑی آفت اور سختی کی گھڑی ہے پھر جب انسان اس دن یہ دیکھے گا کہ بغیر نیک عمل کے ان آفتوں سے نجات نہیں مل سکتی، تو اس وقت ہر شخص اپنے نیک وبد عملوں کو سوچے گا مگر اس وقت کا سوچنا کچھ فائدہ نہ دیوے گا، اس وقت تو یہی انجام ہوگا کہ جس شخص نے دنیا میں فقط عیش و عشرت میں اپنی ساری عمر گنوائی اور اس عیش و عشرت میں عقبی کو بھولا رہا وہ دوزخی قرار پائے گا، اور جس کے دل میں اللہ کے روبرو کھڑے ہونے کا کھٹکالگا رہا اور اس کھٹکے کے سبب سے وہ اپنے نفس کو برے کاموں سے ہمیشہ روکتا رہا اور نیک کاموں میں نفس کو لگاتارہا، وہ جنتی ٹھہرے گا نبی ﷺ نے فرمایا جو شخص عمر بھر نیک کاموں میں جہاں تک ہوسکا لگارہا اس کو بھی اس دن یہ پچھتاوا ہوگا کہ اس نے اور زیادہ نیک عمل کیوں نہیں کیے کہ زیادہ ثواب کا مستحق ٹھہرتا۔

(ف 1) یعنی آخر وہ گھڑی کب آئے گی اور قیامت کب قائم ہوگی۔

(ف 2) یعنی اس کا وقت ٹھیک معین کرکے بتلانا آپ کا کام نہیں اس کا علم خدا ہی پر حوالہ کرنا ہے۔

(ف 3) یعنی آپ کا کام قیامت کی خبر سنا کر لوگوں کو ڈرادینا ہے ، اب جس کے دل میں اپنے انجام کی طرف سے کچھ خوف ہوگا یہ خوف آخرت کی استعداد ہوگی وہ سن کر ڈرے گا اور ڈر کرتیاری کرے گا، گویا آپ کا ڈرانا نتیجہ کے اعتبار سے صرف ان ہی لوگوں کے حق میں ہوا جو اس سے منتفع ہونے کی اہلیت رکھتے ہیں ، ورنہ ناہل لوگ تو انجام سے غافل ہوکران ہی فضول بحثوں میں پڑے ہوئے ہیں کہ قیامت کس تاریخ کس دن کس ماہ میں آئے گی۔

(ف 1) یعنی اب تو شور مچا رہے ہیں کہ قیامت ک ےآنے میں دیر کیوں ہے جلد کیوں نہیں آجاتی، مگر اسوقت معلوم ہوگا کہ بہت جلد آئی بیچ میں دیر کچھ نہیں لگی۔