79. Surah An-Naazi'aat

17۔ اب ذکر فرمانبرداروں کا ہورہا ہے۔ ان کا ٹھکانا جنت کے سوا اور کہیں نہیں۔ (آیت) ” ھی الماوی “۔ میں ھی کلمہ تخصیص ہے۔ ونھی النفس عن الھوی، ھوی سے مراد حرام خواہش ہے، تو جس نے نفس کو حرام خواہشوں سے روکا رکھا “۔ کے معنی یہ ہوئے کہ جس نے عقیدہ صحیح کے ساتھ عمل صالح کو بھی جمع رکھا۔ عن الھوی۔ ھوی کے عموم میں ایسی خواہش داخل ہے جسے نفس محبوب رکھے، اور اس میں رضاء حق و خشیت الہی کا کوئی لحاظ نہ ہو، محققین اہل سنت کہتے ہیں۔ کہ ہر ذکر و عبادت و مجاہدہ بھی، جو کتاب وسنت سے ماخوذ نہ ہو، لذات نفس ہی کے لیے کیا جاتا ہے۔ اور ھوی کے حکم میں داخل ہے، اور اسی لئے باطل فرقوں کو اہل بدعت کی طرح اہل ہوی کہنا بھی درست ہے۔ صوفیہ محققین نے آیت سے ضبط نفس کی فضیلت پر استدلال کیا ہے (آیت) ” خاف مقام ربہ “۔ صوفیہ عارفین نے خوف کے تین درجے بتائے ہیں۔ پہلا درجہ یہ کہ قول اور عمل میں مؤاخذۂ اخروی کا دھڑکا لگا رہے۔ یہ مقام اہل تقوی کا ہوتا ہے۔ دوسرا درجہ یہ کہ وقوع خطاولغزش سے محبوب کی نظر سے گرجانے کا دھڑکا لگا رہے۔ یہ مقام اہل محبت کا ہے۔ تیسرا درجہ یہ ہے کہ کسی نتیجہ کے خیال کے بغیر محض ہیبت و عظمت ذات سے لرزتا رہے۔ یہ مقام عبدیت ہے۔ اور عبد محض کا مرتبہ کہتے ہیں کہ متقین وعشاق دونوں سے بلند تر ہے۔

18۔ یعنی آپ (علیہ السلام) کو جب خود ہی اس کے وقت کا علم تعین کے ساتھ نہیں دیا گیا ہے تو آپ (علیہ السلام) انہیں کیا بتائیں گے۔ (آیت) ” یسئلونک “۔ یعنی یہ سوال، تعریض و انکار کی راہ سے کررہے ہیں۔

19۔ اور جن کے دلوں میں سرے سے قیامت کا عقیدہ اور اس کی طرف سے اندیشہ ہی نہیں، ان کے لئے آپ کی ساری تبلیغ بےاثر ہے۔ (آیت) ” یخشھا “۔ ضمیر ھا، الساعۃ کی طرف ہے۔

20۔ یعنی دنیوی عمر کی ساری مدت طویل انہیں سمٹ سمٹا کر بہت ہی مختصر معلوم ہوگی، اور جس عذاب کی جلدی آج طنزوتعریض کی راہ سے مچا رہے ہیں۔ جب وہ آہی جائے گا، تو اسے واقعۃ بھی یہ بہت ہی جلد آپڑنے والاسمجھیں گے۔ انتہائے ہر اس ویاس کے وقت دنیا میں طویل گزشتہ مدت چشم زدن میں گزری ہوئی معلوم ہوتی ہے۔