(ف 2) لہو یعنی کھیل ہر اس باطل کو کہتے ہیں جو آدمی کو نیکی سے اور کام کی باتوں سے غفلت میں ڈالے ، کہانیاں افسانے اسی میں داخل ہیں ۔

شانِ نُزول : یہ آیت نضر بن حارث بن کلدہ کے حق میں نازل ہوئی جو تجارت کے سلسلہ میں دوسرے مُلکوں میں سفر کیا کرتا تھا ، اس نے عجمیوں کی کتابیں خریدیں جن میں قصّے کہانیاں تھیں وہ قریش کو سناتا اور کہتا کہ سیدِ کائنات (محمّدِ مصطفٰے صلی اللہ علیہ وآلہٖ وسلم ) تمہیں عاد و ثمود کے واقعات سناتے ہیں اور میں رستم و اسفند یار اور شاہانِ فارس کی کہانیاں سناتا ہوں ، کچھ لوگ ان کہانیوں میں مشغول ہو گئے اور قرانِ پاک سننے سے رہ گئے ۔ اس پر یہ آیت نازل ہوئی ۔

(ف 3) یعنی براہِ جہالت لوگوں کو اسلام میں داخل ہونے اور قرآنِ کریم سننے سے روکیں اور آیاتِ الٰہیہ کے ساتھ تمسخُر کریں ۔

(ف 4) اور ان کی طرف التفات نہ کرے ۔

(ف 5) اور وہ بہرا ہے ۔

(ف 6) یعنی کوئی ستون نہیں ہے تمہاری نظر خود اس کی شاہد ہے ۔

(ف 7) بلند پہاڑوں کے ۔

(ف 8) اپنے فضل سے بارش کی ۔

(ف 9) عمدہ اقسام کے نباتات پیدا کئے ۔

(ف 10) جو تم دیکھ رہے ہو ۔

(ف 11) اے مشرکو ۔

(ف 12) یعنی بُتوں نے جنہیں تم مستحقِ عبادت قرار دیتے ہو ۔

(ف 13) محمّد بن اسحٰق نے کہا کہ لقمان کا نسب یہ ہے لقمان بن باعور بن ناحور بن تارخ ۔ وہب کا قول ہے کہ حضرت لقمان حضرت ایّوب علیہ السلام کے بھانجے تھے ۔ مقاتل نے کہا کہ حضرت ایّوب علیہ السلام کی خالہ کے فرزند تھے ۔ واقدی نے کہا کہ بنی اسرائیل میں قاضی تھے اور یہ بھی کہا گیا ہے کہ آپ ہزار سال زندہ رہے اور حضرت داؤد علیہ السلام کا زمانہ پایا اور ان سے علم اخذ کیا اور ان کے زمانہ میں فتوٰی دینا ترک کر دیا اگرچہ پہلے سے فتوٰی دیتے تھے ، آپ کی نبوّت میں اختلاف ہے اکثر عُلَماء اسی طرف ہیں کہ آپ حکیم تھے نبی نہ تھے ، حکمت عقل و فہم کو کہتے ہیں اور کہا گیا ہے کہ حکمت وہ علم ہے جس کے مطابق عمل کیا جائے ۔ بعض نے کہا کہ حکمت معرفت اور اصابت فی الامور کو کہتے ہیں اوریہ بھی کہا گیا ہے کہ حکمت ایسی شئ ہے کہ اللہ تعالٰی اس کو جس کے دل میں رکھتا ہے اس کے دل کو روشن کر دیتی ہے ۔

(ف 14) اس نعمت پر کہ اللہ تعالٰی نے حکمت عطا کی ۔

(ف 15) کیونکہ شکر سے نعمت زیادہ ہوتی ہے اور ثواب ملتا ہے ۔

(ف 16) حضرت لقمان علٰی نبینا وعلیہ السلام کے ان صاحبزادے کا نام انعم یا اشکم تھا اور انسان کا اعلٰی مرتبہ یہ ہے کہ وہ خود کامل ہو اور دوسرے کی تکمیل کرے تو حضرت لقمان علٰی نبینا وعلیہ السلام کا کامل ہونا تو ''اٰتَیْنَا لُقْمٰنَ الْحِکْمَۃَ'' میں بیان فرما دیا اور دوسرے کی تکمیل کرنا ''وَھُوَ یَعِظُہٗ ''سے ظاہر فرمایا اور نصیحت بیٹے کو کی ۔ اس سے معلوم ہوا کہ نصیحت میں گھر والوں اور قریب تر لوگوں کو مقدم کرنا چاہئے اور نصیحت کی ابتداء منعِ شرک سے فرمائی اس سے معلوم ہوا کہ یہ نہایت اہم ہے ۔

(ف 17) کیونکہ اس میں غیرِ مستحقِ عبادت کو مستحقِ عبادت کے برابر قرار دینا ہے اور عبادت کو اس کے محل کے خلاف رکھنا یہ دونوں باتیں ظلمِ عظیم ہیں ۔

(ف 18) کہ ان کا فرمانبردار رہے اور ان کے ساتھ نیک سلوک کرے ۔ (جیسا کہ اسی آیت میں آگے ارشاد ہے)

(ف 19) یعنی اس کا ضعف دَم بدَم ترقی پر ہوتا ہے جتنا حمل بڑھتا جاتا ہے بار زیادہ ہوتا ہے اور ضعف ترقی کرتا ہے ، عورت کو حاملہ ہونے کے بعد ضعف اور تعب اور مشقّتیں پہنچتی رہتی ہیں ، حمل خود ضعیف کرنے والاہے دردِ زہ ضعف پر ضعف ہے اور وضع اس پر اور مزید شدّت ہے ، دودھ پلانا ان سب پر مزید برآں ہے ۔

(ف 20) یہ وہ تاکید ہے جس کا ذکر اوپر فرمایا تھا ۔ سفیان بن عینیہ نے اس آیت کی تفسیر میں فرمایا کہ جس نے پنج گانہ نمازیں ادا کیں وہ اللہ تعالٰی کا شکر بجا لایا اور جس نے پنجگانہ نمازوں کے بعد والدین کے لئے دعائیں کیں اس نے والدین کی شکر گزاری کی ۔

(ف 21) یعنی علم سے تو کسی کو میرا شریک ٹھہرا ہی نہیں سکتے کیونکہ میرا شریک محال ہے ہو ہی نہیں سکتا ، اب جو کوئی بھی کہے گا تو بے علمی ہی سے کسی چیز کے شریک ٹھہرانے کو کہے گا ، ایسا اگر ماں باپ بھی کہیں ۔

(ف 22) نخعی نے کہا کہ والدین کی طاعت واجب ہے لیکن اگر وہ شرک کا حکم کریں تو ان کی اطاعت نہ کر کیونکہ خالِق کی نافرمانی کرنے میں کسی مخلوق کی طاعت روا نہیں ۔

(ف 23) حسنِ اخلاق اور حسنِ سلوک اور احسان و تحمّل کے ساتھ ۔

(ف 24) یعنی نبی کریم صلی اللہ علیہ وآلہٖ وسلم اور آپ کے اصحاب کی راہ اسی کو مذہبِ سنّت و جماعت کہتے ہیں ۔

(ف 25) تمہارے اعمال کی جزا دے کر ۔ ''وَصَّیْنَا الْاِ نْسَانَ'' سے یہاں تک جو مضمون ہے یہ حضرت لقمان علٰی نبینا وعلیہ السلام کا نہیں ہے بلکہ انہوں نے اپنے صاحبزادے کو اللہ تعالٰی کے شکرِ نعمت کا حکم دیا تھا اور شرک کی ممانعت کی تھی تو اللہ تعالٰی نے والدین کی طاعت اور اس کا محل ارشاد فرما دیا ، اس کے بعد پھر حضرت لقمان علٰی نبینا وعلیہ السلام کا مقولہ ذکر کیا جاتا ہے کہ انہوں نے اپنے فرزند سے فرمایا ۔

(ف 26) کیسی ہی پوشیدہ جگہ ہو اللہ تعالٰی سے نہیں چُھپ سکتی ۔

(ف 27) روزِ قیامت اور اس کاحساب فرمائے گا ۔

(ف 28) یعنی ہر صغیر و کبیر اس کے احاطۂ علمی میں ہے ۔

(ف 29) امر بالمعروف و نہی عن المنکَر کرنے سے ۔

(ف 30) ان کا کرنا لازم ہے ۔ اس آیت سے معلوم ہوا کہ نماز اور امربالمعروف اور نہی عن المنکَر اور صبر بر ایذا یہ ایسی طاعتیں ہیں جن کا تمام اُمّتوں میں حکم تھا ۔

(ف 31) براہِ تکبُّر ۔

(ف 32) یعنی جب آدمی بات کریں تو انہیں حقیر جان کر ان کی طرف سے ر خ پھیرنا جیسا متکبِّرین کا طریقہ ہے اختیار نہ کرنا ، غنی و فقیر سب کے ساتھ بتواضُع پیش آنا ۔

(ف 33) نہ بہت تیز نہ بہت سُست کہ یہ دونوں باتیں مذموم ہیں ایک میں شانِ تکبُّر ہے اور ایک میں چھچھورا پن ۔ حدیث شریف میں ہے کہ بہت تیز چلنا مومن کا وقار کھوتا ہے ۔

(ف 34) یعنی شور و شغب اور چیخنے چِلّانے سے احتراز کر ۔

(ف 35) مدعٰی یہ ہے کہ شور مچانا اور آواز بلند کرنا مکروہ و ناپسندیدہ ہے اور اس میں کچھ فضیلت نہیں ہے ، گدھے کی آواز باوجود بلند ہونے کے مکروہ اور وحشت انگیز ہے ۔ نبی کریم صلی اللہ علیہ وآلہٖ وسلم کو نرم آواز سے کلام کرنا پسند تھا اور سخت آواز سے بولنے کو ناپسند رکھتے تھے ۔

(ف 36) آسمانوں میں مثل سور ج ، چاند ، تاروں کے جن سے تم نفع اٹھاتے ہو اور زمینوں میں دریا ، نہریں ، کانیں ، پہاڑ ، درخت ، پھل ، چوپائے وغیرہ جن سے تم فائدے حاصل کرتے ہو ۔

(ف 37) ظاہری نعمتوں سے درستیٔ اعضاء و حواسِ خمسہ ظاہرہ اور حسن و شکل و صورت مراد ہیں اور باطنی نعمتوں سے علمِ معرفت و ملکاتِ فاضلہ وغیرہ ۔ حضرت ابنِ عباس رضی اللہ تعالٰی عنہما نے فرمایا کہ نعمتِ ظاہرہ تو اسلام و قرآن ہے اور نعمتِ باطنہ یہ ہے کہ تمہارے گناہوں پر پردے ڈال دیئے ، تمہارا افشاءِ حال نہ کیا ، سزا میں جلدی نہ فرمائی ۔ بعض مفسِّرین نے فرمایا کہ نعمتِ ظاہرہ درستیٔ اعضاء اور حسنِ صورت ہے اور نعمتِ باطنہ اعتقادِ قلبی ۔ ایک قول یہ بھی ہے کہ نعمتِ ظاہرہ رزق ہے اور باطنہ حسنِ خُلق ۔ ایک قول یہ ہے کہ نعمتِ ظاہرہ احکامِ شرعیہ کا ہلکا ہونا ہے اور نعمتِ باطنہ شفاعت ۔ ایک قول یہ ہے کہ نعمتِ ظاہرہ اسلام کا غلبہ اور دشمنوں پر فتح یاب ہونا ہے اور نعمتِ باطنہ ملائکہ کا امداد کے لئے آنا ۔ ایک قول یہ ہے کہ نعمتِ ظاہرہ رسول کا اِتّباع ہے اور نعمتِ باطنہ ان کی مَحبت ۔ رَزَقَنَا اللہُ تَعَالٰی اِتِّبَاعَہٗ وَ مَحَبَّتَہٗ صلی اللہ تعالٰی علیہ وآلہٖ وسلم ۔

(ف 38) تو جو کہیں گے جہل و نادانی ہو گا اور شانِ الٰہی میں اس طرح کی جرأت و لب کشائی نہایت بیجا اور گمراہی ہے ۔

شانِ نُزول : یہ آیت نصر بن حارث و اُبَیْ بن خلف وغیرہ کُفّار کے حق میں نازل ہوئی جو باوجود بے علم و جاہل ہونے کے نبی کریم صلی اللہ علیہ وآلہ وسلم سے اللہ تعالٰی کی ذات و صفات کے متعلق جھگڑے کیا کرتے تھے ۔

(ف 39) یعنی اپنے باپ دادا کے طریقے ہی پر رہیں گے ۔ اس پر اللہ تبارک و تعالٰی فرماتا ہے ۔

(ف 40) جب بھی وہ اپنے دادا ہی کی پیروی کئے جائیں گے ۔

(ف 41) دینِ خالص اس کے لئے قبول کرے ، اس کی عبادت میں مشغول ہو ، اپنے کام اس پر تفویض کرے ، اسی پر بھروسہ رکھے ۔

(ف 42) اے سیدِ انبیاء صلی اللہ علیہ وآلہٖ وسلم ۔

(ف 43) یعنی ہم انہیں ان کے اعمال کی سزا دیں گے ۔

(ف 44) یعنی تھوڑی مہلت دیں گے کہ وہ دنیا کے مزے اٹھائیں ۔

(ف 45) آخرت میں اور وہ دوزخ کا عذاب ہے جس سے وہ رہائی نہ پائیں گے ۔

(ف 46) یہ ان کے اقرار پر انہیں الزام دینا ہے کہ جس نے آسمان و زمین پیدا کئے وہ اللہ واحد لاشریک لہ ہے تو واجب ہوا کہ اس کی حمد کی جائے ، اس کا شکر ادا کیا جائے اور اس کے سوا کسی اور کی عبادت نہ کی جائے ۔

(ف 47) سب اس کے مملوک ، مخلوق اور بندے ہیں تو اس کے سوا کوئی مستحقِ عبادت نہیں ۔

(ف 48) اور ساری خَلق اللہ تعالٰی کے کلمات کو لکھے اور وہ تمام قلم اور ان تمام سمندروں کی سیاہی ختم ہو جائے ۔

(ف 49) کیونکہ معلوماتِ الٰہیہ غیرِ متناہی ہیں ۔

شانِ نُزول : جب سیدِ عالَم صلی اللہ علیہ وآلہٖ وسلم ہجرت کر کے مدینہ طیّبہ تشریف لائے تو یہود کے علماء و احبار نے آپ کی خدمت میں حاضر ہو کر کہا کہ ہم نے سنا ہے کہ آپ فرماتے ہیں ''وَمَآ اُوْتِیْتُمْ مِّنَ الْعِلْمِ اِلَّا قَلِیْلاً '' یعنی تمہیں تھوڑا علم دیا گیا تو اس سے آپ کی مراد ہم لوگ ہیں یا صرف اپنی قوم ؟ فرمایا سب مراد ہیں ، انہوں نے کہا کیا آپ کی کتاب میں یہ نہیں ہے کہ ہمیں توریت دی گئی ہے اس میں ہر شئ کا علم ہے ؟ حضور نے فرمایا کہ ہر شئ کا علم بھی علمِ الٰہی کے حضور قلیل ہے اور تمہیں تو اللہ تعالٰی نے اتنا علم دیا ہے کہ اس پر عمل کرو تو نفع پاؤ ، انہوں نے کہا آپ کیسے یہ خیال فرماتے ہیں آپ کا قول تو یہ ہے کہ جسے حکمت دی گئی اسے خیرِ کثیر دی گئی تو علمِ قلیل اور خیرِ کثیر کیسے جمع ہو ۔ اس پر یہ آیتِ کریمہ نازل ہوئی ، اس تقدیر پر یہ آیت مدنی ہو گی ۔ ایک قول یہ بھی ہے کہ یہود نے قریش سے کہا تھا کہ مکّہ میں جا کر رسولِ کریم صلی اللہ علیہ وآلہٖ وسلم سے اس طرح کا کلام کریں ۔ ایک قول یہ ہے کہ مشرکین نے یہ کہا تھا کہ قرآن اور جو کچھ محمّدِ مصطفٰے صلی اللہ علیہ وآلہٖ وسلم لاتے ہیں یہ عنقریب تمام ہو جائے گا پھر قصّہ ختم ۔ اس پر اللہ تعالٰی نے یہ آیت نازل فرمائی ۔

(ف 50) اللہ پر کچھ دشوار نہیں اس کی قدرت یہ ہے کہ ایک کُن سے سب کو پیدا کر دے ۔

(ف 51) یعنی ایک کو گھٹا کر دوسرے کو بڑھا کر اور جو وقت ایک میں سے گھٹاتا ہے دوسرے میں بڑھا دیتا ہے ۔

(ف 52) بندوں کے نفع کے لئے ۔

(ف 53) یعنی روزِ قیامت تک یا اپنے اپنے اوقاتِ معیّنہ تک ، سورج آخر سال تک اور چاند آخرِ ماہ تک ۔

(ف 54) وہی ان اشیاءِ مذکورہ پر قادر ہے تو وہی مستحقِ عبادت ہے ۔

(ف 55) فنا ہونے والے ان میں سے کوئی مستحقِ عبادت نہیں ہو سکتا۔