Ayah 31:22۔ یہ ایسی کتاب کی آیتیں ہیں جو محکم اور حکمت سے لبریز ہے یعنی اپنے احکام میں محکم اور پکی کتاب ہے یا یہ کہ با حکمت اور پر حکمت ہے اور حکمت کی باتوں سے لبریز ہے۔ تیسیر میں دونوں قولوں کو جمع کردیا یہ کہ مطلب یہ ہے کہ قرآن کریم میں اس سورت میں جو مذکور ہے یہ آیتیں ہیں کتاب حکیم کی ۔
Ayah 31:33۔ یہ آیتیں یا یہ قرآن کریم نیک لوگوں کے لئے ہدایت اور رحمت ہیں ۔ یعنی مؤمنین و محسنین کیلئے ہدایت اور رحمت کا سبب ہے یعنی اس کتاب سے وہ لوگ صحیح رہنمائی حاصل کرتے ہیں اور اللہ تعالیٰ کی رحمت کے مستحق ہوتے ہیں اگرچہ قرآن کریم تمام بنی نوع انسان کے لئے موجب ہدایت و رحمت ہے لیکن چونکہ اس سے صحیح فائدہ مؤمنین اور محسنین ہی اٹھاتے ہیں اس لئے محسنین کا ذکر فرمایا آگے محسنین کی صفات بیان فرمائیں۔
Ayah 31:44۔ محسنین وہ لوگ ہیں جو نماز کی پابندی کرتے ہیں اور زکوٰۃ ادا کرتے ہیں اور وہ آخرت پر پورا یقین رکھتے ہیں ۔ محسنین کے اوصاف میں تین چیزوں کا ذکر فرمایا ۔ نماز ، زکوٰۃ اور آخرت کا کامل یقین ، لفظ محسن کی تفصیل کئی جگہ گزر چکی ہے اور احسان کی بحث بھی ہوئی ہے اور شاید اسی سورت کے تیسرے رکوع میں پھر تذکرہ آجائے اور زکوٰۃ کی فرضیت اگرچہ مدینہ منورہ میں ہوئی ہے لیکن اس کی مشروعیت ہوسکتا ہے کہ مکہ میں بھی ہو۔
یہ حال ! قرآن شریف کا موجب ہدایت اور سبب رحمت ہونا ان مسلمانوں کے لئے نمایاں ہے جو مخلص مسلمان ہیں عمل کے اعتبار سے بھی اور اعتقاد کے اعتبار سے بھی اسی کو آگے بیان فرمایا۔
Ayah 31:55۔ یہی لوگ اپنے پروردگار کے سیدھے راستے پر ہیں اور یہی ہیں فلاح پانے والے اور اپنے مقصد میں کامیاب ہونے والے ، یعنی اس قرآن کریم اور اس پر عمل کرنے اور اعتقاد رکھنے کی برکت سے وہ فلاح پانے والے ہیں ۔ قرآن کریم کی ہدایت اور اس کی رحمت کا یہاثر ہوا کہ پروردگار کی سیدھی راہ پر بھی رہے اور فلاح بھی حاصل ہوئی ۔
اب آگے بعض شرارت پسندوں کا ذکر فرمایا تا کہ نیکوں اور شریروں کا فرق معلوم ہو۔
Ayah 31:66۔ اور لوگوں میں سے بعض آدمی وہ بھی ہے جو ان باتوں کو خریدتا پھرتا ہے جو کھیل کی باتیں اور غافل کرنیوالی باتیں ہیں تا کہ بےجانے بوجھے اللہ کی راہ سے گمراہ کرے اور اس راہ حق کا مذاق اڑائے ، یہ وہ لوگ ہیں جن کے لئے ذلت اور اہانت آمیز عذاب ہے۔
نضر بن حارث کافروں میں سے ایک شخص تھا جو پیغمبر اسلام کا سخت مخالف اور بد ترین دشمن تھا وہ چاہتا تھا کہ قرآن کی طرف لو گ متوجہ نہ ہوں وہ تجارت کی غرض سے فارس جاتا اور وہاں سے رستم اور اسفند یار کے قصے خرید لاتا اور مکہ میں لوگوں کو جمع کر کے سناتا تا کہ قرآن سننے اور اسلام قبول کرنے سے باز رہیں لوگوں سے کہتا کہ یہ پیغمبر تم کو عاد اوثمود کے قصے سناتا ہے میں تم کو ایران کی مشہور لڑائیوں اور مشہورپہلوانوں کے قصے سناتا ہوں تم ہی بتائو دونوں قسم کے قصوں میں دلچسپی کون سے قصوں میں سے ایک دفعہ ایک گانے والی لونڈی خرید لایا جس کو دیکھتا کہ اسلام کی طرف مائل ہے اس کو گھر لا کر کھانا کھلاتا اور گانا سنوا کر قرآن کریم سے مقابلہ کرتا کہ بتائو تفریح اور دل لگی کس میں ہے۔
مقصد اس کا یہ تھا کہ لوگ لغو مشغلوں میں الجھ جائیں اور قرآنی ہدایت سے متنفر ہوجائیں یہ آیت اسی کے بارے میں نازل ہوئی ہے۔ لہو الحدیث انہی باتوں کو فرمایا جو لوگوں کو مشغول کر دے اور صحیح چیز سے غافل کردے۔ علماء فرماتے ہیں کل ما شغل عن عبادۃ اللہ وذکر ہ من السمروالاضاحیک و الخرفات والغناء و نخوھا فھو لھو یعنی جو چیز بھی اللہ تعالیٰ کی عبادت اور اس کی یاد سے غافل کرے خواہ وہ کہانیاں ہوں یا اور ہنسنے ہنسانے کی باتیں اور خرافات ہوں گانا اور راگ ہو سب لہو ہے یہ ضرور ہے کہ لہو کے مختلف درجات ہیں جو لہو گمراہ ہونے اور گمراہ کرنے کا سبب بنے وہ کفر ہے اور کوئی لہو معصیت کا سبب ہو وہ معصیت ہے اور جو لہو کسی امر شرعی کا فوت کرنیوالا نہ ہو اور اس میں کوئی شرعی غرض اور مصلحت بھی نہ ہو وہ اگرچہ مباح ہے لیکن خلاف اولیٰ ضرور ہے۔ البتہ گھوڑے پرچڑھنا اور گھوڑے کو دوڑانا ، تیر اندازی کرنا اور اس میں مسابقت اور اپنی اہل سے ملا عبت یہ لہو باطل سے مستثنیٰ ہیں ۔ بعض حضرات نے غنا کو بھی اس آیت سے لہو میں داخل کیا ہے۔ ( واللہ اعلم)
حضرت شاہ صاحب (رح) فرماتے ہیں ایک کافر تھا جس کو دیکھتا کہ نرم دل ہوا مسلمانی طرف جھکا اپنے گھر لے جاتا شراب پلاتا اور راگ اور ناچ دکھاتا اس رندی کی مجلس سے ایمان کا اثر ہٹ جاتا اس کو یہ فرمایا ۔ 12
آیت میں اسی لہو کو ظاہر فرمایا ہے جو ضلال اور اضلال کا سبب ہو اور ظاہر ہے کہ ایسا لہو یقینا کفر ہے۔
Ayah 31:77۔ اور جب اس شخص مذکور پر اور اسکے سامنے ہماری آیتیں تلاوت کی جاتی ہیں تو وہ تکبر کرتا ہوا منہ موڑ لیتا ہے اور متکبرانہ اندازے سے پیٹھ پھر کر چل دیتا ہے کہ گویا اس نے ان آیات کو سنا ہی نہیں جیسے اس کے دونوں کانوں میں ثقل ہے ۔ سو اے پیغمبر آپ اس شخص کو ایک درد ناک سزا ور عذاب کی بشارت اور خوشخبری دے دیجئے۔ یعنی ایک طرف اس کے اضلال کی یہ حالت کہ مغنیہ عورت اور لہو کی باتیں جمع کرتا پھرتا ہے ۔ دوسری طرف جب خود اس کے سامنے آیات الٰہی پڑھی جائیں تو تکبر کے ساتھ ان آیات الٰہی کو ناقابل التفات سمجھ کر پیٹھ پھیر کر چلاجائے اور ایسا بن جائے جیسے اس نے سنا ہی نہیں اور جیسے اس کے دونوں کان بہرے ہیں تو ایسے شریر کو آپ درد ناک عذاب کی خبر دیجئے ۔ اب آگے نیک اور اہل ایمان کا ذکر فرماتا ہے۔
Ayah 31:88۔ بلا شبہ جو لوگ ایمان لائے اور نیک اعمال کے پابند رہے اور نیک عمل کرتے رہے تو ان کے لئے نعمت کے باغ اور عیش کی جنتیں ہیں۔
Ayah 31:99۔ وہ ان باغوں میں ہمیشہ رہیں گے یہ وعدہ کیا ہے اللہ تعالیٰ نے وعدہ سچا اور وہی کمال قوت اور کمال حکمت کا مالک ہے۔ یعنی اہل ایمان جو نیک اعمال کیا کرتے ہیں ان کے لئے گونا گوں نعمتوں کے باغ ہیں جن میں وہ ہمیشہ رہیں گے ان کو وہاں سے نکالا نہ جائے گا یہ اللہ تعالیٰ کا سچا وعدہ ہے اور اس کا وعدہ پورا ہی ہو کر رہتا ہے کیونکہ وہ کمال قوت و حکمت کا مالک ہے۔
Ayah 31:1010۔ اللہ تعالیٰ نے آسمانوں کو بغیر ستونوں کے بنایا چناچہ تم ان کو دیکھتے ہو اور اسی نے زمین میں بھاری بھاری پہاڑ ڈال دیئے اور رکھ دیئے تا کہ کہیں تم کو زمین لیکر ہلنے نہ لگے اور ڈانو ڈول نہ ہونے لگے اور اسی نے زمین میں ہر قسم کے حیوانات پھیلائے اور ہم نے آسمان کی جانب سے پانی اتارا ۔ پھر ہم نے زمین میں ہر قسم کی عمدہ اقسام کی نباتات اگائیں ۔ یعنی بلا کسی ٹیک کے آسمان بنائے زمین پر پہاڑ رکھے ہر قسم کے جاندار حیوانات پھیلانے آسمان سے پانی برسا کر بھانت بھانت کی نباتات اگائیں ہر قسم کی اچھی اچھی اور عمدہ عمدہ نباتات پیدا کیں نبابات میں بھی جوڑے ہوتے ہیں یہی نباتات کی قسمیں ہیں ان موالید ثلاثہ ( حیوانات ، نباتات ، جمادات ) کے جوڑے سب اللہ تعالیٰ نے ہی پیدا فرمائے ہیں ۔ آگے معبود ان باطلہ کے پرستاروں سے مطالبہ ہے کہ تم بتائو تمہارے معبودوں نے کیا پیدا کیا ہے۔
Ayah 31:1111۔ یہ سب چیزیں تو خدا تعالیٰ نے پیدا کی ہیں اب تم لوگ ذرا مجھ کو یہ تو دکھائو اور بتائو کہ اللہ تعالیٰ کے سوا اوروں نے کیا کیا بنایا اور پیدا کیا ہے اصل بات یہ ہے کہ یہ مشرک کھلی اور صریح گمراہی میں پڑے ہوئے ہیں ۔ یعنی ان چیزوں کو جب سے یہ موجود ہوئی ہیں اللہ تعالیٰ نے موجود فرمائی ہیں اور بنائی ہیں اور ان کا موجد ہی مستحق الوہیت ہے جس کے تم قائل نہیں تو اب بتائو کہ اس مستحق الوہیت کے علاوہ اوروں نے کیا بنایا ہے تا کہ شرک فی الالوہیت ثابت ہو۔
چاہئے تو یہ تھا کہ اس دلیل کے بعد شرک سے باز آجائے اور اپنی ہارمان لیتے لیکن اپنی ضد اور اصرار پر قائم ہیں اور یہ ظالم اور ناانصاف لوگ صریح گمراہی میں مبتلا ہیں کہ بغیر کسی دلیل کے شریک پر اڑے ہوئے ہیں۔
Ayah 31:1212۔ اور بلا شبہ ہم نے لقمان کو حکمت اور دانشمندی عطا کی اور اس کو حکم دیا کہ اللہ تعالیٰ کا شکر ادا کرتا رہ اور جو شکر بجا لاتا ہے تو وہ اپنے ہی نفع کو اور بھلے کو شکر بجا لاتا ہے اور جو شخص نا سپاسی اور کفران نعمت کرتا ہے تو اللہ تعالیٰ بےنیاز اور سب خوبیاں سراہا ہے۔ حکمت یعنی علم و عمل سے نوازا بظاہر معلوم ہوتا ہے کہ حضرت لقمان نبی نہ تھے البتہ ان کو حکمت و دانائی سے نوازا گیا تھا انہوں نے بہت سے انبیاء کی شاگردی کی تھی اور عمر بھی بڑی پائی تھی ۔ وہ سیاہ رنگ تھے ، بعض نے کہا وہ غلام تھے پھر آزاد ہوئے بنی اسرائیل میں مفتی تھے چونکہ ان کے عام نصائح توحید کو مشتمل میں اس لئے ان کا یہاں ذکر فرمایا اور چونکہ انبیاء (علیہم السلام) کی صحبت میں رہے تھے اس لئے ان کی باتوں میں آسمانی دین کی جھلک ہے وہ حکیم تھے مرد صالح تھے بنی اسرائیل کو پندرہ نصائح کیا کرتے تھے ، بعض لوگوں نے لقمان کا ایک قول نقل کیا ہے وہ فرماتے ہیں ۔ میں نے چار ہزار نبیوں کی خدمت کی ہے اور ان کے کلام میں سے میں نے آٹھ باتیں محفوظ کی ہیں۔
1۔ اگر تو نماز میں ہو تو اپنے دل کی حفاظت کر۔
2۔ اگر کھانے پر ہو تو اپنے حلق کی حفاظت کر یعنی زیادہ نہ کھا۔
3۔ اور جب تو کسی غیر کے گھر میں ہو تو اپنی آنکھوں کی حفاظت کر۔
4۔ اور جب تو لوگوں میں ہو تو اپنی زبان کی حفاظت کر۔
5۔ 6۔ دو چیزوں کو ہمیشہ یاد رکھو۔
7۔ 8۔ اور دو چیزوں کو بھلادے۔
یادرکھنے والی دو چیزیں یہ ہیں ایک اللہ تعالیٰ کو دوسرے موت کو ہمیشہ یاد کیا کر ۔ بھول جانے والی دو چیزیں یہ ہیں ایک تو جب کسی اپنے یا کسی غیر کے ساتھ احسان کرے تو اس احسان کو بھول جادوسرے جو تیرے ساتھ کوئی برائی کرے تو اسکی برائی کو بھلا دے۔
حضرت شاہ صاحب (رح) فرماتے ہیں ۔ حضرت لقمان غلام تھے حبشی حضرت دائود کے وقت میں اللہ نے ان کو حکمت دی یعنی عقل کی راہ سے دے باتیں کھولیں جو موافق ہوئیں پیغمبروں کے حکم کے۔ 12
Ayah 31:1313۔ او وہ واقہ قابل ذکر ہے جب لقمان نے اپنے بیٹے سے کہا دارانحالی کہ وہ اس کو نصیحت کر رہا تھا اے میرے بیٹے اللہ تعالیٰ کے ساتھ شرک نہ کی جو اور کسی کو شریک نہ ٹھہرائیو بلا شبہ شرک بڑا بھاری ظلم ہے یعنی جس نے شرک کیا اس نے اپنی جان پر بڑا بھاری ظلم کیا ۔
؎ الحمد للہ لا شریک لہ ومن اباھا فنفسہ ظلما
ایک فارسی شاعر نے کیا خوب کیا ہے
؎ ہر کہ دردریائے وحدت غرقہ باشد جان او جوہر فرد حقیقت یافت از جانان او
اب آگے حق تعالیٰ ماں باپ کے حق کا ذکر فرماتے ہیں۔
Ayah 31:1414۔ اور ہم نے انسان کو اس کے ماں باپ کے بارے میں تاکید اور تقیید کی ہے اس کی والدہ نے سستی اور ضعف پر ضعف برداشت کرتے ہوئے اس کو حمل میں رکھا اور پھر دو سال میں اس کادودھ چھوٹتا ہے اے انسان تو میرا اور اپنے ماں باپ کا حق مانا کر اور شکر گزار رہا کر کیونکہ آخر میری ہی طرف واپس آنا ہے ۔ جب عورت کو پیٹ رہتا ہے تو اس کو روز بروز تھکن سستی اور ضعف بڑھتا رہتا ہے اسی وجہ سے اس کی شکر گزاری کو اپنے ساتھ جمع فرمایا کہ میرے شکر کے ساتھ ساتھ اپنے ماں باپ کا بھی شکر ادا کرتا رہ پھر پیدا ہونے کے بعد عام طور پر دو سال تک دودھ کا سلسلہ جاری رہتا ہے اگرچہ گنجائش ڈھائی سال تک ہے۔ کما فی الفقہ۔
شکر کا مطلب یہ ہے کہ اللہ کی عبادت بجا لائے اور ماں باپ کی خدمت اور ان کی اطاعت کرے۔ انسانی پیدائش اور انسانی تربیت میں حقیقی احسان تو اللہ تعالیٰ ہی کا ہے لیکن مجازی طورپر چونکہ ماں باپ کا بھی دخل ہے اس لئے اللہ تعالیٰ کے بعد ان کا حق سب سے مقدم اور فائق ہے اور چونکہ انسان کی بازگشت حضرت حق تعالیٰ ہی کی جناب میں ہے اس لئے یہ بات سمجھ لینی چاہئے کہ حقوق الٰہی کے ساتھ وہاں حقوق العباد کے بارے میں بھی باز پرس ہوگی اور ماں باپ کی خدمت اور ان کے حقوق کی ادائیگی کا سوال بھی ہوگا ۔
حضرت شاہ صاحب (رح) فرماتے ہیں یہ کلام بیچ میں اللہ صاحب فرماتا ہے۔ لقمان نے بیٹے کو ماں باپ کا حق نہ کہا تھا کہ اپنی غرض معلوم ہوتی اللہ صاحب نے شرک سے پیچھے اور نصیحتوں سے پہلے ماں باپ کا حق فرمایا کہ بعد اللہ کے ماں باپ کا حق ہے باپ نے اللہ کا حق بتایا اللہ نے باپ کا اور رسول کا اور مرشد کا حق اللہ ہی کی طرف میں ہے کہ اسی کے نائب ہیں ۔ 12
Ayah 31:1515۔ اور اگر دونوں تجھ پر اس بات کا زور ڈالیں کہ تو کسی ایسی چیز کو میرا شریک ٹھہرا جس کے شریک الوہیت اور شرک فی العبادت ہونے کی تیرے پاس کوئی سند اور دلیل نہ ہو تو ان کا کہنا نہ مان اور ان کی اطاعت نہ کر ہاں دنیوی معاملات میں مثلاً خدمت اور انفاق وغیرہ میں بھلی طرح اور دستور کے موافق ان کا رفیق اور ہم صحبت رہ اور پیروی اسی شخص کی کر اور اسی کی راہ چل جو میری طرف رجوع ہوا پھر تم سب کو میری طرف آنا ہے اور تم سب کی بازگشت میری ہی طرف ہے پس میں تم کو امن تمام اعمال کی حقیقت سے آگاہ کر دوں گا جو تم کیا کرتے تھے۔ یعنی باوجود ان حقوق کے جو والدین کے تجھ پر ہیں اگر وہ کبھی تجھ کو میرا شریک ٹھہرانے پر آمادہ کریں اور کوشش کریں اور تجھ پر زور ڈالیں تو ان کی اطاعت نہ کیجیو کیونکہ اللہ تعالیٰ کی عبادت میں کسی کو شریک کرنے اور اس کی الوہیت میں کسی کو شریک ٹھہرانے پر نہ کوئی دلیل ہے اور نہ کوئی سند ہے جو تیرے علم میں آتی ، ما لیس لک بہ علم کا یہی مطلب ہے کہ جب شرک پر آج تک کوئی دلیل ہی قائم نہیں ہوسکی تو تیرے پاس دلیل کہاں ہے اور جب دلیل نہیں تو شرک میں ان کا کہنا نہ مان ، البتہ دنیوی معاملات میں جیسے ان کی خدمت اور نا ن و نفقہ وغیرہ کی خبر گیری دستور کے موافق کرتے رہنا اور خوبی اور بھلائی سے ان کے ساتھ صبر کرتے رہنا اس میں کوتاہی نہ ہو ان میں ان کی رفاقت اور ساتھ دینے میں کمی نہ کر ، ہاں دین کے معاملہ میں ان کا کہنا نہ مان بلکہ اس کی راہ چل اور اس شخص کے راستے کی اتباع اور پیروی کر جو میری طرف رجوع ہوا یعنی جو میرے احکام پر عامل ہو اور میرے احکام پر اعتقاد رکھتا ہو اس کے راستے پر چل اور دین کے بارے میں مشرک ماں با پ کا کہنا نہ مان، آگے فرمایا تم سب کو میری ہی طرف آنا ہے اس وقت میں تم کو آگاہ کردوں گا اور تم کو وہ سب اعمال بتلا دوں گا جو تم کیا کرتے تھے۔
حضرت شاہ صاحب (رح) فرماتے ہیں شریک نہ مان جو معلوم نہیں یعنی شبے میں نہ مان اور یقین سمجھ کر تو کیوں مانے 12 اب آگے پھر حضرت لقمان کی نصائح کا ذکر ہے۔
Ayah 31:1616۔ اے میرے بیٹے کوئی عمل رائی کے دانے کے برابر ہو پھر خواہ وہ کسی پتھر کے اندر ہو یا وہ آسمان میں ہو یا زمین میں ہو تو اللہ تعالیٰ اس عمل کو بھی لا حاضر کریگا بیشک اللہ تعالیٰ نہایت باریک ہیں بہت با خبر ہے۔ اللہ تعالیٰ کے علم وقدرت کے کمال سے بیٹے کو آگاہ فرمایا کہ اس کا علم اتنا وسیع ہے کہ کوئی چھوٹے سے چھوٹا عمل چاہے رائی کے دانے ہی کے برابر کیوں نہ ہو اور کہیں پوشیدہ ہو کسی پتھر میں ہو یا زمین کے اور آسمان کے کسی حصے میں مخفی ہو یعنی کتنا ہی پوشیدہ ہو اور خواہ کتنا ہی دورہو اللہ تعالیٰ قیامت کے دن حساب کے وقت اس کو بھی لا حاضر کرے گا اس عمل کا چھوٹا ہونا یا پوشیدہ ہونا یا آسمان جیسی دوری پر ہونا اللہ تعالیٰ کے احاطہ علم اور احاطہ قدرت سے خارج نہیں کرسکتا ، کوئی عمل ہو یا خصلت و عادت ہو وقت پر اس سب کا اظہار ہوجائے گا اور لطیف وخبیر ہر چیز کو لا حاضر کرے گا ۔
Ayah 31:1717۔ اے میرے بیٹے نماز پڑھاکر اور نماز کی پابندی کیا کر اور اچھی باتوں کی نصیحت کیا کر اور بری باتوں سے اور برے کاموں سے منع کیا کر اور جو مصیبت تجھ پر پڑے اس کو سہار اور برداشت کر ، بلا شبہ یہ کام بڑی ہمت کے کاموں میں سے ہیں ۔ یعنی بیٹا نماز کی پابندی کر اور بھلے کاموں کی نصیحت کیا کر برے کاموں سے لوگوں کو منع کیا کر اور روکا کر اور اس تبلیغ کے سلسلہ میں عام طور سے نصیحت کیا کر برے کاموں سے لوگوں کو منع کیا کر اور روکا کر اور اس تبلیغ کے سلسلہ میں یا عام طور سے جو مصیبت تجھ پر پڑے اور جو مصائب پڑیں ان کو خندہ پیشانی سے برداشت کر اور جھیل اور سہار یہ نیک کام کرنا اور نیک کاموں کی راہ میں جو مصائب آئیں ان کو برداشت کرنا بڑی ہمت کے کاموں میں سے ہیں ۔ حضرت شاہ صاحب (رح) فرماتے ہیں نماز کے ساتھ زکوٰۃ نہیں کہی ایسے لوگوں کے پاس مال کہاں رہتا ہے۔ 12 اب آگے اخلاق و عادات کی اصلاح کا ذکر ہے۔
Ayah 31:1818۔ اور لوگوں سے منہ پھلا کر بےرخی کا برتائو نہ کر اور لوگوں سے اپنا رخ نہ پھیر اور زمین میں اترا کر اور متکبرانہ چال سے نہ چلا کر بیشک اللہ تعالیٰ کسی تکبر کرنے والے شیخی مارنے والے کو پسند نہیں کرتا ۔ مطلب یہ ہے کہ لوگوں سے خندہ پیشانی اور اخلاق کے ساتھ ملا کر لوگوں کو حقیر سمجھ کر تکبر کا برتائو نہ کیا کر اور منہ پھلا کر بےرخی کے ساتھ بات نہ کیا کر زمین پر اکڑ کر چلنے سے منع فرمایا کیونکہ یہ متکبروں کی چال ہے ۔ بلا شبہ اللہ تعالیٰ ہر تکبر کرنے والے فخر کرنے والے کو دوست نہیں رکھتا اور شیخی خور سے متکبرکوپسند نہیں کرتا۔ حضرت شاہ صاحب (رح) فرماتے ہیں گال نہ پھلا یعنی غرور سے نہ دیکھو۔ 12
حضرت شاہ صاحب (رح) تصعر خدک کا ترجمہ گال مت پھلا کیا ہے مطلب وہی ہے جو ہم نے عرض کیا تصعر کا ترجمہ لغت میں روبگروانیدن از کبر کیا ہے۔
Ayah 31:1919۔ اور اپنی رفتار اور چال میں میانہ روی اور اعتدال اختیارکر اور اپنی آواز کو نیچا اور ست رکھ بلا شبہ آوازوں میں بد ترین اور بری آواز گدھوں کی آواز ہے۔ یعنی رفتار متوسط اختیار کر اور آواز میں نرمی اور پستی پیدا کر۔ حدیث میں آتا ہے جب تم گدھے کی آواز سنو تو اعوذ باللہ من الشیطن الرجیم کہا کرو۔
Ayah 31:2020۔ کیا تم لوگوں کو یہ بات معلوم نہیں ہوئی اور تم نے یہ بات نہیں دیکھی کہ اللہ تعالیٰ نے ان سب چیزوں کو جو آسمانوں میں ہیں اور جو زمین میں ہیں تمہارے کام میں لگا رکھا ہے اور تمہارے لئے ان سب چیزوں کو مسخر کر رکھا ہے اور اللہ تعالیٰ نے تم پر اپنی تمام ظاہری و باطنی نعمتیں پوری کر رکھی ہیں اور لوگوں میں سے بعض آدمی ایسا بھی ہے جو اللہ تعالیٰ کے بارے میں بدوں کسی واقفیت اور بغیر کسی دلیل اور بغیر کسی روشن کتاب کے جھگڑا کرتا ہے۔ یعنی آسمان میں سورج اور چاند اور سیارے یعنی پورا نظام شمسی جس کی تسخیر پر مخلوق کی زندگی کا دارومدار ہے اور زمین کی چیزیں مویشی اور زمین کی کھیتی باڑی ، دریا ، پہاڑ ، غرض کوئی ایسی چیزجو انسانی منافع اور کسی گوشہ زندگی سے وابستہ نہ ہو۔
ان سب چیزوں کو اللہ تعالیٰ نے انسان کی ضروریات زندگی کیلئے مسخر کر رکھا ہے ، ظاہری نعمت سے یا تو وہ چیزیں ہیں جو اس سے جانی جائیں اور سمجھی جائیں یا جسمانی اور مادی نعمتیں مراد ہوں اور باطنی نعمتیں وہ جن کو سمجھنا محض عقل سے ہو یا روحانی نعمتیں مراد ہوں جو انبیاء علیہم الصلوٰۃ والسلام کی وساطت سے حاصل ہوں یہ جھگڑا لو شخص یا تو نضر بن حارض ہے جس کا ذکرسورۂ حج کے شروع میں گزر چکا ہے یا کوئی یہودی ہے جو بغیر کسی بد یہی علم اور بغیر ہدایت یعنی عقلی اور کتاب یعنی دلیل نقلی کے جھگڑا کرتا اور مسلمانوں سے اللہ تعالیٰ کے بارے میں الجھتا رہتا ہے۔ ہوسکتا ہے کہ علم سے مراد دلیل ہو اور ھدی سے مراد رسول کا قول ہو اور کتاب منیر سے مراد کتب سماوی ہو۔
بہر حال نہ استدلال عقلی ، نہ کسی پیغمبر کا قول نہ کسی آسمانی کتاب کی شہادت اور باوجود اس تہی دامنی کے کٹ حجتی کرتا ہے اور خدا تعالیٰ کے بارے میں بحث مباحثہ اور جھگڑا کرتا رہتا ہے۔
Ayah 31:2121۔ اور جب اس قسم کے جھگڑا لوافراد سے کہا جاتا ہے کہ جو کچھ اللہ تعالیٰ نے نازل فرمایا ہے اس کی پیروی اور اتباع کرو تو یہ کہتے ہیں کہ ہرگز نہیں بلکہ ہم تو اس طریقے کی پیروی کریں گے۔
اور اس طریقہ کار کی اتباع کریں گے جس پر ہم نے اپنے بڑوں کو پایا ہے بھلا کیا اگر شیطان ان کے بڑوں کو دوزخ کے عذاب کیط رف بلاتا رہا ہو تب بھی یہ انہی کی پیروی کریں گے۔ یعنی جب کبھی ان کو ما انزل اللہ کی دعوت دی جاتی ہے تو انکار کرتے ہیں اور اپنے بڑوں کو کورا نہ تقلید اور ان کے غلط راستوں کی پیروی کرنے پر اصرار کرتے ہیں یعنی دلیل کی طرف نہیں آتے اور بلا دلیل بڑوں کا راستہ اختیار کرتے ہیں۔ حضرت حق تعالیٰ فرماتا ہے اگر شیطان ان کے بڑوں کو عذاب سعیر کی طرف بلاتا رہا ہو تب بھی وہ انہی کا اتباع کریں گے۔ عذاب سعیر کا سبب ہے گمراہی تو مطلب یہ ہے کہ گمراہی کی طرف شیطان ان کے بڑوں کو بلاتا رہا تب بھی یہ ان شیطان کے ماروں کی پیروی کرتے رہیں گے۔ سعیر دہکتی ہوئی آگ کو کہتے ہیں مراد اس سے جہنم ہے۔
Ayah 31:2222۔ اور جس شخص نے اپنا رخ اللہ تعالیٰ کی طرف کرلیا اور اپنی ذات کو اللہ تعالیٰ کے سپرد کردیا اور وہ شخص مخلص بھی ہے تو اس نے بڑا مضبوط حلقہ اور مستحکم کڑا پکڑ لیا اور سب کاموں کا انجام اللہ تعالیٰ ہی کی طرف لوٹتا ہے ۔ اللہ تعالیٰ کی طرف رح کرنے کا مطلب یہ ہے کہ فرمانبرداری کی غرض سے اس نے اپنا منہ خدا کے سامنے کھ دیا یعنی اسلام قبول کرلیا اور عمل و اعتقاد کو درست کرلیا اور وہ مخلص بھی ہو، یعنی دل سے مسلمان ہو تو گویا اس نے ایک ایسا مضبوط اور پختہ حلقہ کو پکڑ لیا کہ گرنے کا اندیشہ نہ رہا ہر اعتبار سے محفوظ ہوگیا اور اخیر سب کاموں کا اللہ ہی کی طرف ہے وہاں ہر ایک کو اپنے اپنے اعمال کے موافق سزا یا صلہ عطا ہوگا ۔ عروۃ الوثقیٰ کی تفصیل سورة بقرہ کی تسہیل میں گزر چکی ہے۔
Ayah 31:2323۔ اور جو شخص کفر و انکار کرتا ہے تو اس کا کفر اے پیغمبر آپ کو رنجیدہ نہ کرے ان سب کی بازگشت ہماری ہی طرف ہے اور ہماری ہی طرف ان سب کو لوٹنا ہے پھر ہم ان کو ان تمام اعمال کی حقیقت سے آگاہ کردیں گے جو وہ کرتے رہے ہیں بیشک اللہ تعالیٰ سینوں کی تمام باتوں سے خوب واقف ہے اور جو شخص باوجود ان دلائل واضحہ اور ثابتہ کے پھر بھی کفر پر قائم ہے اور جما ہوا ہے تو آپ ایسے لوگوں پر غمگین نہ ہوں اور آپ کو ان کا کفر رنجیدہ نہ کرے چونکہ ان سب کو ہماری ہی سرکار میں واپس آنا ہے تو ہم ان کو وہ تمام باتیں بتادیں گے اور جتا دیں گے یہ جو دنیا میں کرتے رہے تھے کیونکہ اللہ تعالیٰ دلوں تک کی باتوں سے خوب واقف ہے اور جب کوئی بات حتیٰ کہ دلوں تک کی باتیں اس پر مخفی نہیں ہیں تو کوئی عمل خواہ کیسا ہی پوشیدہ یا ظاہر کیوں نہ ہو سب کا حساب ہوجائیگا اور اس کی سزا دی جائیگی اس لئے آپ کو کسی کا کفر رنجیدہ اور غمگین نہ کرے۔
Ayah 31:2424۔ ہم ان لوگوں کو تھوڑے دنوں سو د مند رکھیں گے پھر ہم ان کو نا چار و مجبور کر کے کشاں کشاں سخت عذاب کی طرف لے جائیں گے ۔ یعنی دنیا کی زندگی میں ان منکروں کو تھوڑا فائدہ پہنچے گا اور یہ دنیا کی لذتوں سے فائدہ اٹھاتے رہیں گے پھر ان کو مضبوط و مجبورکر کے سخت عذاب یعنی جہنم کی طرف لے جائیں گے آگے اللہ تعالیٰ کی خالقیت کا منکروں کی زبان سے اعتراف کا ذکر فرمایا۔
Ayah 31:2525۔ اور اے پیغمبر اگر آپ ان دین حق کے منکروں سے دریافت فرمائیں کہ آسمانوں کو اور زمین کو کس نے بنایا ہے اور کس نے پیدا کیا تو وہ لوگ ضرور جواب دیں گے کہ اللہ تعالیٰ نے آپ فرمایئے الحمد للہ اصل بات یہ ہے کہ ان میں کہ اکثر لوگ اتنا بھی نہیں جانتے ۔ یعنی ایک بات تو تسلیم کرلی اور اس کا اعتراف کرلیا اس پر آپ الحمد للہ کہئے ۔ دوسری بات جو یہ نہیں مانتے وہ بالکل ہی ظاہر ہے کہ جو مخلوق اور مصنوع ہو وہ مستحق الوہیت نہیں ہوا کرتا یہ وصف خالقت تو اللہ تعالیٰ کا تسلیم کرتے ہیں لیکن اس کی مخلوق کو اور اس کے مصنوع کو اللہ تعالیٰ کی الوہیت میں شریک کرتے ہیں بلکہ اکثر تو ان میں کے ان باتوں کو جانتے ہی نہیں چونکہ دوسرا مقدمہ بالکل ظاہر تھا اس لئے الحمد للہ فرمایا کہ کفار پر الزام ثابت ہوگیا بعض تو اتنا بھی نہیں جانتے کہ اس اعتراف سے کس طرح ان پر حجت قائم ہوگئی اور شرک کا بطلان ظاہر ہوگیا ۔
Ayah 31:2626۔ جو کچھ آسمانوں میں اور زمین میں موجود ہے سب اللہ تعالیٰ کی ملک اور اسی کی مملوک ہے اور بلا شبہ اللہ تعالیٰ بےنیاز اور تمام خوبیوں والا ہے۔ یہ دوسرے مقدمہ کی تائید اور تقریر ہے کہ مملوک مالک کی الوہیت میں کس طرح حصہ دار ہوسکتا ہے اللہ تعالیٰ نے کسی کا محتاج نہیں اور سب خوبیوں والا ہے آگے خوبیوں کا بیان ہے۔
Ayah 31:2727۔ اور جتنے درخت روئے زمین پر ہیں اگر ان سب کی قلمیں بن جائیں اور موجود ہ سمندر کی سیاہی ہو اور اس میں موجود سمندر کے بعد اس میں اور سات سمندر شامل ہوں تب بھی اللہ کی باتیں تمام اور ختم نہ ہوں بلا شبہ اللہ تعالیٰ کمال قوت اور کمال حکمت کا مالک ہے۔ کہتے ہیں آیت کا تعلق یہود کے بعض شبہات سے ہے کہ وہ توریت کے بعد یہ خیال کرتے تھے کہ اب کوئی مزید علم نہیں ہے۔
بہر حال ! آیت کا مطلب یہ ہے کہ اللہ تعالیٰ کے کلمات اور اس کی خوبیاں اس قدر بےحد و حساب ہیں کہ اگر تمام روئے زمین کے درختوں کی اقلام بنا لی جائیں اور موجود ہ سمندر کے ساتھ اور سات سمندر ملا کر ان کی سیاہی بنا لی جائے اور اللہ تعالیٰ کی باتیں اس کی صفات اور اس کے کلمات لکھے جائیں تو سیاہی خشک ہوجائے اور قلمیں گھس جائیں لیکن اللہ تعالیٰ کے کلمات ختم نہ ہوں اور بات بھی یہی ہے کہ محدود قوتوں سے لا محدود اور غیر متناہی و کمالات کہاں منضبط ہوسکتی ہیں وہ عزیز اور حکیم ہے ۔ من بعدہ کا یہ مطلب بھی ہے کہ بحر محیط کی سیاہی ختم ہوجانے کے بعد اور سات سمندروں کی سیاہی بنائی جائے۔
لا احصی ثناء ً علیک انت کما اثنیت علی نفسک جل جلالہٗ ما اعظم شانہ ٗ
Ayah 31:2828۔ تم سب کا ابتدائی پیدا کرنا اور مرنے کے بعد دوبارہ پیدا کرنا اور زندہ کرنا بس ایسا ہی ہے جیسے ایک شخص کا پیدا کرنا اور مرنے کے بعد جلانا یقینا اللہ تعالیٰ سب کچھ سننے والا اور سب کچھ سب کا زندہ کرنا ایسا ہی ہے جیسے ایک آدمی کو پیدا کرنا اور ایک آدمی کو مرنے کے بعد زندہ کرلینا نہ سب کو پیدا کرنے اور دوبارہ زندہ کرنے میں کچھ تعب اور نہ ایک کو پیدا کرنے اور دوبارہ زندہ کرنے میں کوئی آسانی اور سہولت ! حضرت حق کے ارادے کا جہاں تعلق ہوا اور چیز موجود ہوئی ہر ایک کی سنتا اور ہر ایک کو دیکھتا ہے۔
Ayah 31:2929۔ اے مخاطب کیا تجھ کو یہ بات معلوم نہیں اور تو نے یہ نہیں دیکھا کہ اللہ تعالیٰ رات کو دن میں داخل کردیتا ہے اور دن کو رات میں داخل کردیتا ہے اور اس نے سورج اور چاند کو کام میں لگا رکھا ہے اور مسخرکر رکھا ہے کہ ان میں سے ہر ایک مقررہ وقت تک چلتا رہے گا اور نیز یہ بات کہ جو کام تم کرتے ہو اللہ تعالیٰ ان تمام کاموں سے با خبر ہے۔ یعنی رات کے اجزاء کو دن بنا دیتا ہے اور دن کے اجزاء کو رات میں داخل کردیتا ہے جس سے سردی اور گرمی ہوتی ہے ، سورج اور چاند دونوں مسخر ہیں اور کام میں لگے ہوئے ہیں اور ان کی تسخیر اور ان کا چلنا ایک مقررہ وقت رہے گا یہ دلیل بھی توحید کی ہے۔
حضرت شاہ صاحب (رح) نے الی اجل مسمی کی تفسیر بیان کی ۔ بہر حال مطلب ایک ہی ہے کہ جب وہ ٹھہرا وعدہ آجائے گا تو یہ تمام نظام ختم ہوجائے گا اور قیامت قائم ہوجائے گی۔
Ayah 31:3030۔ عالم علوی کے یہ سب تصرفات اس بات کی دلیل ہیں کہ اللہ تعالیٰ ہی کی ذات ثابت اور حق ہے اور جن چیزوں کی یہ مشرک عبادت کرتے ہیں اور جن کو پکارتے ہیں وہ سراسر باطل اور لچر ہیں اور اللہ تعالیٰ ہی سب سے عالی شان اور سب سے بڑا ہے۔ یعنی وہی حق اور واجب الوجود ہے اور جن چیزوں کی اس کی الوہیت میں شریک کیا جا رہا ہے وہ سراسر پوچ اور لچر ہیں اور ان تمام تصرفات میں اسکا کوئی شریک نہیں ہے اور وہی سب سے بلند اور بڑا ہے آگے اور اس کی توحید اور اس کی قدرت کی نشانیاں مذکور ہیں۔
Ayah 31:3131۔ اے مخاطب کیا تو نے توحید کی اس دلیل پر غور نہیں کیا کہ سمندر میں اللہ تعالیٰ ہی کی نعمت اور اس کے فضل ہی سے جہاز چلتے ہیں تا کہ وہ تم کو کچھ اپنی قدرت کی نشانیاں مشاہدہ کرائے یقینا اس امر مذکور یعنی جہاز رانی اور بحری سفر میں ہر سفر کرنیوالے شکر بجا لانے والے کیلئے بڑی بڑی نشانیاں ہیں ۔ یعنی یہ بات غور کرنے کی ہے کہ مسافروں سے اور مال سے بھرے ہوئے جہاز کس طرح سمندروں کو چیرتے پھاڑتے چلے جاتے ہیں اور تم اللہ کے فضل اور اس کے احسانات سے کس طرح سود مند ہوتے ہو ۔ یہ اس کی قدر ت کی کتنی بڑی نشانی ہے اس نے اس لئے یہ احسان کیا ہے تا کہ تم کو اپنی توحید اور اپنی قدرت کے دلائل سے روشناس کرائے ۔ صبر کرنیوالوں اور شکر بجا لانے والوں کا خاص طور پر ذکر فرمایا کہ جب جہاز کے سفر میں پانی کی طغیانی سے کچھ تکلیف ہوتی ہے تو صبرو تحمل سے کام لیتے ہیں اور جب کنارے پر مع الخیر پہنچ جاتے ہیں تو اللہ تعالیٰ کا شکر بجا لاتے ہیں ۔ آگے کفر ان نعمت کرنے والوں کا ذکر فرمایا۔
Ayah 31:3232۔ اور جب ان لوگوں پر دریا کی موجیں سائبانوں کی طرح چھا جاتی ہیں اور بادلوں کی طرح ان کو ڈھانک لیتی ہیں تو وہ لوگ اللہ تعالیٰ ہی پر خالص اعتقاد رکھ کر اللہ تعالیٰ کو پکارنے لگتے ہیں اور اسی کی نری بندگی کا اعتقاد کر کے اس کو پکارتے ہیں ۔ پھر جب وہ اللہ تعالیٰ ان کو نجات دے کر خشکی پر لے آتا ہے تو کوئی ان میں سے راہ راست پر قائم رہتا اور بیچ کی چال اختیار کرلیتا ہے اور کوئی عہد شکنی کرتا ہے اور ہماری نشانیوں کا بس وہی لوگ انکار کرتے ہیں جو عہد شکن قول کے جھوٹے اور نا سپاس ہیں ۔
یعنی سمندر میں جب طوفان آجائے اور موج بدلی کی طرح سائبان بن کر گھیرے ڈالے لو اس وقت اللہ تعالیٰ کی توحید خالص کا اعتقاد کر کے خدا تعالیٰ کو پکارتے ہیں پھر جب ان کو نجات مل جاتی ہے اور خشکی پر آجاتے ہیں تو کوئی کوئی تو اپنے قول وقرار پر قائم رہتے ہوئے اعتدال کی راہ یعنی توحید پر قائم رہتا ہے اور کوئی کوئی قول وقرار سے پھرجاتا ہے اور ہماری نشانیوں کا انکار نہیں کیا کرتے مگر غدار عہد شکن قول کے جھوٹے کفران نعمت کے خوگر ایسا کیا کرتے ہیں ۔
حضرت شاہ صاحب (رح) فرماتے ہیں کہ کوئی ہے بیچ کی چال پر یعنی وہ چال جو خوف کے وقت تھی سو وہ تو کسی کو نہیں رہتی مگر نرا بھول بھی نہ جاوے ایسے بھی کم نہیں تو اکثر منکر ہوتے ہیں ، قدرت سے اپنی تدبیر پر رکھتے ہیں یا کسی ارواح کی مدد پر ۔ 12
خلاصہ۔ یہ ہے کہ خوف کی حالت وت باقی نہیں رہتی البتہ کوئی عہد کو یاد رکھ کر توحید پر قائم رہتا ہے اور اکثر عذر کرتے ہیں کشتی میں جو عہد کیا تھا اس کو توڑ دیا یہ مطلب ختار کا اور کنارے پر پہنچ کر شکر بجا لانا تھا اسکی بجائے کفر کیا یہ مطلب ہے کفور کا ۔ یہاں چونکہ مقتصد ختار کے مقابلے میں آیا ہے اس لئے بعض مفسرین نے فرمایا ہے کہ توحید کا کم و بیش پابند رہتا ہے اور کفر کی طرف نہیں لوٹتا ۔ اب آگے کشتی کے خوف سے زیادہ ایک خوف کا دن یاد دلاتا ہے۔
Ayah 31:3333۔ اے افراد نوع انسانی اپنے پروردگار سے ڈرتے رہو اور اس دن سے ڈرو جس دن نہ تو باپ اپنے بیٹے کے کچھ کام آسکے گا اور نہ بیٹا ہی اپنے باپ کے کچھ کام آسکے گا۔ بیشک اللہ تعالیٰ کا وعدہ حق اور سچا ہے سو تم کو کہیں دنیوی زندگی دھوکے میں نہ ڈال دے اور دھوکے میں مبتلا نہ کردے اور تم کو اللہ تعالیٰ کے بارے میں وہ دھوکے باز یعنی شیطان کسی دھوکے میں نہ ڈال دے ۔ یعنی اللہ تعالیٰ سے ڈرو اور اس خوفناک دن سے ڈرتے رہو جس دن بیٹے کی طرف سے کوئی مطالبہ اس کا باپ نہ پورا کرسکے اور باپ پر اگر کوئی مطالبہ ہو تو اس کو بیٹا نہ بھگتا سکے بلکہ ہر ایک کو اپنی اپنی پڑی ہو۔
لکل امری منھم یومئذ شان یغنیہ
اس افراتفری میں کوئی کسی کا نہ ہوگا اور جب قریبی باپ بیٹا ایک دوسرے کے کام نہ آئے تو پوتے پروتے اور دادا پردادا کا تو کہنا ہی کیا ہے پھر یہ بھی یقین کرو کہ اللہ تعالیٰ کا وعدہ حق ہے یہ دن ضرور آ کر رہے گا کہیں ایسا نہ ہو کہ دنیوی زندگی تم کو کسی فریب اور دھوکے میں مبتلا کر دے اور تم سمجھ بیٹھو کہ یہ دنیوی آرام و عیش یوں ہی جاری رہیں گے یا جو یہاں مزے میں ہیں وہاں بھی مزے میں ہوں گے اور تم کو وہ دھوکے باز بھی دھوکا نہ دیدے اور فریب میں مبتلا نہ کر دے جو تمہارا پرانا دشمن ہے یعنی شیطان ، یا طویل اور المبی امید ۔ ( واللہ اعلم)
حضرت شاہ صاحب (رح) فرماتے ہیں یعنی شیطان دھوکا دے کہ اللہ غفور الرحیم ہے اور دنیا کا جینا بہکا دے کہ جسکو یہاں بھلا ہے اس کو وہاں بھی بھلادے۔ 12
اب آگے حارث یا وارث بن عمر اور ایک محارب کے چند سوالات کا جواب ہے۔
Ayah 31:3434۔ بلاش بہ قیامت کی خبر اللہ تعالیٰ ہی کو ہے اور وہی مینہ برساتا ہے اور جو کچھ رحم میں ہے اس کو بھی وہی جانتا ہے اور کوئی شخص نہیں جانتا کہ وہ خود کل کیا کرے گا اور نہ کوئی شخص یہ جانتا ہے کہ وہ کس سر زمین پر مرے گا ، بلا شبہ اللہ تعالیٰ سب باتوں کا جاننے والا با خبر ہے۔
حدیث میں ان آیات کو مفاتیج الغیب فرمایا ہے ان آیات میں علم غیب کے اختصاص کا ذکر ہے ، قیامت کا علم کہ وہ کب آئے گی یا بارش کہاں ہوگی اور کتنی ہوگی اور کس وقت ہوگی ۔ حاملہ عورت کے رحم میں کیا ہے اور ارحام میں کیا ہے خون ہے یا رسولی ہے یا کہلڑی ہے یا بیٹا ہے یا بیٹی ہے اگر اندازا ً کسی کو معلوم ہوجائے یا کی آلے سے پتہ چل جائے تو یہ علم غیب نہیں ہے اسی طرح کل کام باوجود پروگرام بنانے کے بسا اوقات ملتوی اور غلط ہوجاتے ہیں اور کسی سر زمین پر مرنا ہے ان سب امور کا یہی حالت ہے۔
اور یہ مطلب بھی نہیں ہے کہ اللہ تعالیٰ کے مغیبات ان پانچ باتوں میں منحصر ہیں چونکہ بعض محاربین نے یہ باتیں آپ ؐ سے دریافت کی تھیں اور آپ نے انکار کیا تھا اس پر یہ آیت نازل ہوئی ۔ پس اکوان غیبہ کے علم کلی کی طرف اشارہ کرنا ہے ۔ حضر مقصود نہیں ہے ، اکوان غیبہ کا علم کلی اللہ تعالیٰ ہی کے ساتھ مختص ہے اور بجز اللہ تعالیٰ کے علم کل کسی کو نہیں ۔
تم تفسیر سورة القمان ۔ وللہ الحمد والفضل والنعمۃ