16، تتجافی، دوررہتے ہیں ۔ ، جنوبھم عن المضاجع، مضاجع، مضجع کی جمع ہے وہ جگہ جہاں پر سوتے ہیں پھر وہ رات کے آخری پہر میں عبادت کرتے ہیں اور نماز کے لیے کھڑے ہوتے ہیں۔
تتجافی جنوبھم سے کون سے لوگ مراد ہیں
اس آیت کی تفسیر میں مفسرین کا اختلاف ہے۔ حضرت انس ؓ کی روایت ہے کہ یہ آیت انصار کے بارے میں نازل ہوئی ، ہم مغرب کی نماز پڑھ کر گھروں کو نہیں لوٹتے تھے یہاں تک کہ رسول اللہ ﷺ کے ساتھ عشاء کی نماز ادا کرتے تھے۔
حضرت انس ؓ ہی کی روایت ہے کہ اس آیت کا نزول کچھ صحابہ کے متعلق ہوا تھا جو مغرب کی نماز پڑھ کر عشاء کی نماز تک مسجد میں رہتے تھے۔ ابن ابی حازم اور منکدر کی روایت ہے کہ ان دونوں بزرگوں کا قول ہے کہ اس سے مراد صلوۃ اوابین ہے۔
ابن عباس ؓ کی روایت ہے کہ فرشتے ان لوگوں کی جماعت کو ڈھانپ لیتے ہیں جو مغرب اور عشاء پڑھ کر گھروں کو جاتے ہیں۔ (یعنی مغرب کی نماز کے بعد گھروں کو نہیں جاتے بلکہ صلوۃ اوابین پڑھتے رہتے ہیں، پھر عشاء کی نماز کا وقت جب آتا تو وہ عشاء پڑھ کرجاتے ۔ عطاء کا قول ہے کہ اس سے مراد وہ لوگ ہیں جو مغرب کے بعد سوتے نہیں ۔ یہاں تک کہ عشاء نہ پڑھ لیتے ۔ حضرت ابوالدرداء حضرت ابوذر اور حضرت عبادہ بن صامت ؓ عشاء اور فجر کی نماز رسول اللہ ﷺ کے ساتھ جماعت سے پڑھتے تھے ۔ دوسری روایت میں ہے کہ نبی کریم ﷺ نے ارشاد فرمایا جس نے عشاء کی نماز جماعت سے پڑھی اس نے آدھی رات نماز پڑھی اور جس نے فجر کی نماز جماعت سے پڑھی اس نے گویا پوری رات نماز میں گزاری۔
حضرت ابوہریرہ ؓ راوی ہیں کہ رسول ﷺ نے فرمایا، اگر لوگ اذان دینے اور پہلی صف میں شریک ہونے کا ثواب جانتے اور پھر بغیر قرعہ اندازی اذان دینا اور پہلی صف میں شریک ہونا ان کو میسر نہ آتا تو وہ ضرورقرعہ اندازی کرتے اور اگر ظہر کی (باجماعت) نماز کا ثواب ان کو معلوم ہوجائے تو دوڑ تے ہوئے پہلے پہنچے کی کوشش کریں اور اگر باجماعت عشاء اور فجر کی نمازوں کے ثواب سے وہ واقف ہوجائیں تو سرینوں کے بل گھسیٹ کر بھی پہنچیں ۔
حضرت معاذ ؓ نے فرمایا کہ میں نے عرض کیا یارسول اللہ ! مجھے کوئی ایسا عمل بتادیجئے جو مجھے جنت میں لے جائے دوزخ سے دوررکھے ۔ فرمایا : تونے بڑی بات دریافت کی اور اللہ جس کو توفیق دے اس کے لیے دشوار بھی نہیں تو اللہ (ہی) کی عبادت کر، اس کے ساتھ کسی چیز کو شریک قرار نہ دے نماز قائم کرزکٰوۃ اداکر رمضان کے روزے رکھ اور کعبہ کا حج کر۔ پھر فرمایا: کیا میں تجھے خیر کے دروازے نہ بتادوں ؟ (سن ! ) روزہ ڈھال ہے (گناہوں سے اور دوزخ سے بچا نے والا ، مترجم) خیرات گناہوں کو اس طرح بجھادیتی ہے جیسے پانی آگ کو اور وسط رات میں نماز پڑھنا بھی خیر (کا دروازہ) ہے۔ اس کے بعد حضور ﷺ نے آیت ، تتجافی جنوبھم۔۔۔۔۔۔۔۔ یعملون، تک تلاوت فرمائی ۔ پھر فرمایا: کیا میں تجھے امر (دین، مترجم) کا سر اور ستون اور کوہان کی چوٹی نہ بتادوں ؟ میں نے عرض کیا : کیوں نہیں ۔ فرمایا : امر (دین) کا سراسلام ہے اور اس کا ستون نماز ہے اور اس کے ہان کی چوٹی جہاد ہے ۔ اس کے بعد فرمایا : کیا میں تجھے اس سب کی جڑنہ بتادوں ؟ میں نے عرض کیا : کیوں نہیں ۔ حضور ﷺ نے اپنی زبان پکڑکر فرمایا : اس کو روکے رکھ ۔ میں نے عرض کیا : اے اللہ رسول ! کیا زہان سے بات کرنے پر بھی ہماری پکڑہوگی ۔ فرمایا : معاذ ! تجھے تیری ماں روئے ! منہ کے بل یاناک کے بل لوگوں کو دوزخ میں ڈالے جانے کی وجہ سے زبانوں کے نتائج (یعنی الفاظ) ہی تو ہوں گے۔
حضرت ابی امامہ الباہلی سے روایت ہے فرماتے ہیں کہ رسول اللہ ﷺ نے ارشاد فرمایا کہ تم رات کے قیام کو لازم پکڑکیون کہ یہ صالحین کا طریقہ رہا ہے اور تمہاراقرب ہے تمہارے رب کے ساتھ اور تمہارے گنا ہوں کا کفارہ ہے ۔ ان میں سے ایک گناہ بھی ہے۔ حضرت ابن مسعودؓ کی روایت سے بیان کیا ہے کہ رسول اللہ ﷺ نے فرمایا : اللہ دو آدمیوں کو بہت پسند فرماتا ہے ایک تو وہ جو اپنے بستر الحاف میں سے نکل کر محبوب بیوی بچوں کو چھوڑ کر نماز کو اٹھ کھڑا ہوتا ہے ۔ اللہ ملائکہ سے فرماتا ہے میرے بندے کو دیکھو جو اپنے بسترولحاف کے اندر سے نکل کر محبوب بیوی بچوں کو چھوڑ کر میرے ثواب کا امید وار ہوکر اور میرے عذاب سے ڈرکر اٹھ کھڑا ہوا ہے ۔ دوسراوہ شخص جو اللہ کی راہ میں لڑتا ہے پھر شکست پاکر اپنے ساتھیوں کے ساتھ بھاگ کھڑا ہوتا ہے پھر فرار کی حالت میں اس کو خیال آتا ہے کہ جہاد سے بھاگنا کتنا بڑاجرم ہے اور لوٹ کر جہاد میں شریک ہونا کتنی بڑی نیکی ہے ، یہ خیال کرتے ہی وہ لوٹ پڑتا ہے (جہاد میں جاکر شریک ہوتا ہے ) آخراس کا خون بہادیا جاتا ہے یعنی شہید ہوجاتا ہے ۔ اللہ ملائکہ سے فرماتا ہے کہ میر بندے کو دیکھو کہ کس طرح وہ میرے ثواب کی طلب میں اور میرے عذاب سے ڈرکر (جہاد کی طرف) لوٹ پڑا۔ یہاں تک کہ اس کا خون بہادیا گیا۔
حضرت ابوہریرہ ؓ کی روایت ہے کہ رسول اللہ ﷺ علیہ وسلم نے فرمایا: رمضان کے بعد سب سے افضل روزے خدا کے مہینے یعنی محرم کے روزے ہیں اور فرض نماز کے بعد سب سے افضل نماز رات کی نماز ہے۔ (رواہ مسلم شریف)
حضرت ابو مالک اشعری راوی ہیں کہ رسول اللہ ﷺ نے فرمایا : جنت میں کچھ بالاخانے ایسے ہیں جن کا اندرون باہر سے اور بیرون اندر سے نظرآتا ہے ۔ اللہ نے یہ ان لوگوں کے لیے تیارکیے ہیں جو کلام میں نرمی اختیار کرتے ہیں، حاجت مندوں کو کھانا کھلاتے ہیں ، بلاناغہ روزے رکھتے ہیں اور رات میں ایسے وقت نمازیں پڑھتے ہیں جب دوسرے لوگ سوئے ہوتے ہیں ۔ رواہ البیہقی فی شعب الایمان ۔ ترمذی نے یہ حدیث اسی طرح حضرت علی ؓ کی روایت سے بیان کی ہے۔ حضرت ابوہریرہ ؓ کی روایت سے حضرت عبداللہ ابن رواحہ (خزرجی انصاری صحابی ) کے یہ شعرنقل کیے ہیں :
وفینا رسول اللہ یتلواکتابہ اذا انشق معروف من الفجر ساطع
ارانا الھدی بعد العمی فقلوبنا بہ مئو قنات ان ماقال واقع
یبیت یجافی جنبہ عن فراشہ اذا استثقلت بالکافرین المضاجع
، ہم میں میں اللہ کے رسول ﷺ ہیں کہ صبح کو پو پھٹنے کے وقت وہ اللہ کی کتاب پڑھتے ہیں ۔ ہمارے اندھے پن کے بعد انہوں نے ہمیں راستہ دکھایا۔ ہمارے دلوں کو یقین ہے کہ جو کچھ انہوں نے فرمایا وہ سچ ہے ۔ وہ رات کو اپنا پہلو بستر سے جدارکھتے ہیں جب کہ کافروں کے بستر کافروں (کے بار) سے بوجھل پڑے ہوتے ہیں۔
، یوعون ربھم خوفا وطمعا، ابن عباس ؓ نے فرمایا آگ کے خوف سے اور رحمت وثواب وجنت کی امید رکھتے ہو ہوئے اس کا پکار تے ہیں ۔ ، ومما رزقنھم ینفقون ، اس سے مراد فرض صدقہ ہے۔ بعض نے کہا کہ واجب اور نوافل میں ۔