107. Surah Al-Maa'un

سورة الماعون 1: ان آیات سے شخص معین مراد نہیں ہے ۔ بلکہ اس وقت کے عام سرمایہ دار مراد ہیں کہ ان کی ذہنیت اس قسم کی تھی کہ یہ اللہ سے نہیں ڈرتے تھے اور عیش و عشرت میں اس چیز کا کبھی خیال نہیں کرتے تھے کہ ہمیں اللہ کے سامنے ایک دن ان رنگ رلیوں کا جواب دینا ہے ۔ یہ فواحش اور برائیوں پر تو بےدریغ روپیہ خرچ کردیتے تھے ۔ لیکن اگر کوئی یتیم بےنوا آجائے تو اس کو ڈانٹ دیتے تھے ۔ ان کے دلوں میں کبھی یہ جذبہ پیدا نہیں ہوتا تھا کہ اپنی ثروت میں مسکینوں اور غریبوں کو بھی شامل کیا جائے اور ان کی ادنیٰ ضروریات بھی پوری کی جائیں ۔ یہ لوگ محض سنگ دل اور بداخلاق تھے اور کئی صدیاں گزرنے کے بعد آج بھی سرمایہ داری کی یہی ذہنیت ہے ۔ اس میں ذرہ برابر کمی نہیں پیدا ہوئی ۔ آج یہ شراب پر ، ڈنر پر ، گھوڑ دوڑ پر ، جوئے پر اور فیشن پر ہزاروں روپے روزانہ صرف کرسکتا ہے ۔ مگر اسکے پاس روپیہ نہیں ہے تو خدا کے لئے اور صرف قومی اور ملی ضروریات کے لئے نہیں ہے ۔ اس کے بعد ان لوگوں کے لئے اظہار تاسف کیا ہے جو مال و دولت کیحصول میں تو سرگرم ہیں ۔ مگر خدا کے آگے جھکنے میں سست ہیں ۔ جو نمازیں پڑھتے ہیں ۔ مگر سہو و غفلت کے ساتھ محض ریاکارانہ ۔ اور جہاں کچھ ہاتھ سے دینا پڑے ۔ وہاں ان کو تامل نہیں ہوتا ہے ۔ بلکہ صاف انکار کردیتے ہیں ۔ یہ چاہتے ہیں کہ ملت کے لئے خدا کے نام پر تو کچھ نہ دیا جائے اور چند ریاکارانہ سجدوں سے اس کو خوش کرلیا جائے ۔