107. Surah Al-Maa'un

نماز کی تاکید۔ (ف 1) اے محبوب ﷺ کیا آپ نے اس شخص کو بھی دیکھا ہے جو روز جزا کا یقین نہیں رکھتا، یہ وہی شخص ہے جو قیامت کے انکار کے ساتھ اور بھی عیب رکھتا ہے، یتیم کا مال سینہ زوری سے کھاتا ہے اور مسکین کو کھانا کھلانے کی کسی کو رغبت نہیں دلاتا، خود تو کیا دے گا کسی سے دلواتا بھی نہیں ، پس معلوم ہوا کہ بخل کفر کا شعار ہے تو نماز اور زکوۃ وغیرہ فرائض کا ترک بدرجہ اعلی ہو، اور اس کا انجام بہت برا ہوگا، اس لیے ارشاد ہے کہ ان نمازیوں کی خرابی ہے جو اپنی نماز کی حقیقت سے غافل ہیں یہ نہیں جانتے کہ نماز کس کی مناجات ہے اور مقصد نماز سے کیا ہے اور کس قدر اہتمام کے لائق ہے یہ نہیں جانتے کہ نماز مراقبہ حق ہے ہمہ تن، تن من کو اللہ کی طرف متوجہ کرکے پڑھنی چاہیے یہ کیا نماز ہوئی کہ کبھی پڑھی کبھی نہ پڑھی، وقت بےوقت کھڑے ہوگئے باتوں میں اور دنیا کے دھندوں میں جان بوجھ کر وقت تنگ کردیا، پھر بھی تو چارٹکڑیں لگائیں۔ کچھ خبر نہی کس کے روبرو کھڑے ہیں اور احکم الحاکمین کے دربار میں کس شان سے حاضری دے رہے ہیں کیا خدا صرف ہمارے اٹھنے بیٹھنے جھک جانے اروسیدھے ہونے کو دیکھتا ہے ہمارے دلوں پر نظر نہیں رکھتا، کہ ان میں کہاں تک اخلاص اور خشوع کا رنگ موجود ہے۔ ابن ماجہ ، صحیح ابن خزیمہ وغیرہ میں معتبر سند سے ابوہریرہ کی روایت ہے کہ جس کا حاصل یہ ہے کہ نبی ﷺ نے فرمایا اللہ تعالیٰ فرماتا ہے جو شخص دنیا کے دکھاوے کے طور پر کوئی عمل کرے گا اس کا کچھ اجر خدا کی بارگاہ سے ایسے شخص کو ملے گا اس سے معلوم ہوا کہ نماز پر کچھ موقوف نہیں دین کا جو کام دنیا کے دکھلانے کے لیے کیا جائے گا، وہ اللہ کی درگاہ میں ہرگز قبول نہ ہوگا۔

(ف 1) یعنی یہ غافل لوگ زکوۃ صدقات وغیرہ کیا ادا کرتے معمولی برتنے کی چیزیں بھی مثلا سوئی دھاگہ پیالے وغیرہ کسی کو مانگنے نہیں دیتے جن کے دے دینے کا دنیا میں عام رواج ہے۔ مسئلہ : علماء نے فرمایا کہ مستحب ہے کہ آدمی اپنے گھر میں ایسی چیزیں اپنی حاجت سے زیادہ رکھیں جن کی ہمسایوں کو حاجت ہوتی ہے اور انہیں عاریتا دیاکرے۔