98. Surah Al-Bayyina

اہل کتاب کی مخالفت اور رسول ﷺ کی ضرورت تشریح : ایک ہی پیغام ہے جو ہمیشہ تمام پیغمبر دیتے رہے ہیں۔ کہ اللہ ایک ہے اسی کی عبادت کرو جس کا بہترین طریقہ ہے نماز۔ کیونکہ اس سے طہارت ملتی ہے۔ دل کو سکون ملتا ہے وقت کی پابندی کی عادت پڑتی ہے۔ سستی اور کاہلی دور ہوتی ہے۔ اللہ سے ملاقات کا اور دعا کا موقعہ ملتا ہے انسان کے اندر اللہ کا خوف پیدا ہوتا ہے۔ اس کی محبت اور فرمانبرداری کا جذبہ پیدا ہوتا ہے۔ دنیا سے بےنیازی ' خودداری اور کردار میں مضبوطی پیدا ہوتی ہے۔ شرط یہ ہے کہ نماز پورے خلوص ' توجہ اور خشوع و خضوع کے ساتھ صرف اللہ کی خوشنودی حاصل کرنے اور اللہ کے غضب سے ڈرتے ہوئے پڑھی جائے۔ اسی طرح زکوۃٰ دینے کا حکم بھی تمام مذاہب میں دیا گیا ہے کیونکہ یہ بھی باہمی بھائی چارے کی بنیاد ہے اور لوگوں میں معیشت و معاشرت کے لحاظ سے ایک توازن پیدا کرتی ہے اور دلوں سے مال کی محبت ' لالچ ' ہوس اور خود غرضی دور کرتی ہے۔ یہ دونوں باتیں تو ہمیشہ ہر نبی ﷺ نے بتائی ہیں۔ کیونکہ انسان کی روحانی حالت سدھارنے کے لیے شروع دن سے اللہ تعالیٰ نبی ' رسول ﷺ اور پیغمبر بھیجتا رہا ہے۔ لیکن مسئلہ یہی رہا کہ لوگ اپنے رسول ﷺ کی پیروی زیادہ دیر نہ کرتے۔ تعلیمات بھول جاتے ' احکامات میں مرضی سے ردو بدل کرتے رہتے۔ یہ سلسلہ ہمیشہ سے چلتا آیا ہے۔ پھر آخر میں رسول رحمت ﷺ کو اس شرط کے ساتھ بھیجا گیا کہ بس یہ آخری نبی ہوں گے۔ اسی لیے ان کو دی گئی کتاب قرآن کی حفاظت کا ذمہ رب العزت نے خود اپنے ذمہ لے رکھا ہے۔ تو جو لوگ خوف خدا رکھتے ہوئے پکے مسلمان ہیں۔ تمام احکاماتِ الٰہی کی خوش دلی سے پیروی کرتے ہیں اللہ کا خوف دلوں میں رکھتے ہیں۔ ان کے لیے بہترین باغات اور شاندار ٹھکانے کا وعدہ کیا گیا ہے۔ اور جو اس کے خلاف چلتے ہیں وہ دوزخ کے عذاب میں ضرور ڈالے جائیں گے۔ یہ اللہ کا وعدہ ہے اور یہ بھی کہ دونوں ٹھکانے عارضی نہیں بلکہ ہمیشہ ہمیشہ کے لیے ہونگے۔ کیونکہ وہاں موت کا تصور نہیں دیا گیا۔ غرض زندگی میں سب سے زیادہ ضروری چیز ہے خوف خدا۔ ایسے ہی لوگ اللہ کے مقبول بندے ہوتے ہیں۔ اللہ ان سے خوش اور وہ اللہ سے خوش رہتے ہیں۔ اللہ ہمیں اسی گروہ میں شامل ہونے کی توفیق دے آمین۔ حدیثِ دل کسی درویشِ بےکلاہ سے پوچھ خدا کرے تجھے تیرے مقام سے آگاہ الحمد للہ کہ سورة البینہ مکمل ہوگئی