89. Surah Al-Fajr

نیک و بد کی تمیز اور میدان حشر تشریح : اس سورت میں ان لوگوں کو جگانے کی کوشش کی گئی ہے جو شیطان کے بہلاوے میں آ کر سرکشی ' نفرت ' نافرمانی ' تکبر اور ناشکر گزاری کی عادات کو اپنا لیتے ہیں۔ بیشک یہ مال و دولت ' عزت شہرت اور آل و اولاد کی کثرت میں زیادہ سے زیادہ لالچی اور انسانیت کی حدود سے دور ہوتے ہوئے بس اپنے میں ہی مست ہوجاتے ہیں اور ان کے دل میں مال کی محبت اس قدر بڑھ جاتی ہے کہ وہ مال دینے والے (اللہ) سے ہی دور ہوجاتے ہیں اور حرام و حلال کا فرق بھول جاتے ہیں۔ نہ ان کو یہ خیال رہتا ہے کہ یتیم کا مال ہے یا غریب کی مدد کرنی چاہیے۔ بس وہ تو صرف مال کی محبت ہی میں کھو جاتے ہیں۔ اور جب کبھی ان پر عزت ' دولت شہرت کا زوال آجاتا ہے تو واویلا مچا دیتے ہیں بجائے صبر شکر کرنے کے۔ یہ دونوں باتیں ایک مسلمان کی شان کے خلاف ہیں۔ اور ان دونوں عملوں سے انسان پستی اور گناہوں کی غلاظت میں ڈوب جاتا ہے تو ایسے ہی لوگوں کے لیے اللہ تعالیٰ نے ان واضح چار چیزوں کی قسم کھائی ہے کہ ان کو عذاب ضرور ملے گا۔ اب یہ بات کہ اللہ نے اس حقیقت کو زور دے کر بیان کرنے کے لیے ان چار چیزوں کی یعنی فجر ' دس راتیں ' جفت اور طاق اور رات کی جب وہ رخصت ہو رہی ہو ' قسم کیوں کھائی ہے ؟ تو اس کا جواب بھی خود ہی دے دیا گیا ہے کہ '' بیشک یہ چیزیں عقلمندوں کے نزدیک قسم کھانے کے لائق ہیں۔ آخر میں ان لوگوں کا ذکر کیا جو اس کے مقبول ترین بندے ہیں اور جن کو بہترین انعام اور ہمیشہ رہنے کے لیے بہترین خوبصورت اور شاندار ٹھکانے دئیے جائیں گے۔ ایسے لوگوں کی تعریف یوں کی گئی ہے کہ وہ '' اطمینان پانے والی روح یہاں مراد ان لوگوں سے ہے جو دنیا میں نفس مطمنئہ کے مالک تھے۔ ان کی تعریف ایسے کی جاسکتی ہے۔ کہ جو شخص دنیاوی اتار چڑھاؤ ' میں اللہ کا سچا شکر گزار بندہ بن کر رہے۔ ایسے لوگ سچائی کے راستے پر بڑے استقلال سے بےخوف و خطر چلتے چلے جاتے ہیں۔ ہر بات پر اللہ کا شکر ادا کرتے ہیں اور اس طرح ان کے اندر بےپناہ قوت ارادی ' بےخوفی اور سکون و اطمینان پیدا ہوجاتا ہے۔ اور ایسے لوگ نہ حالات سے مارکھاتے ہیں نہ دشمن سے اور نہ ہی شیطان کی چالوں کا شکار ہوتے ہیں۔ ان کو ہر دم زندگی خوشگوار اور کامیاب و پر سکون ہی دکھائی دیتی ہے کیونکہ وہ جانتے ہیں کہ بیشک ہم اللہ کے پیدا کیے ہوئے اور اسی کے بندے ہیں اور اسی کی طرف لوٹ کر جانے والے ہیں۔ مال دولت ' عزت و شہرت سب کچھ ان کے خیال میں بےوقعت ہے وہ ہر چیز کو اللہ کا شکر ادا کرتے ہوئے قبول کرتے ہیں اور ہرگز ناجائز طریقہ استعمال نہیں کرتے۔ یہ بےنیاز ' خود دار اور مقبول خدا بندے نہ صرف اپنے لیے ہی مبارک اور باعث سکون و کامیابی ہوتے ہیں بلکہ یہ اپنے گھر محلہ ' شہر ' ملک ' قوم اور پوری دنیا کے لیے باعث سکون اور باعث ترقی ثابت ہوتے ہیں۔ ایسے ہی لوگ پو رے سماج کے لیے رحمت کا باعث ہوتے ہیں یہ لوگ نفس مطمئنہ رکھنے والے لوگ بھی ہوتے ہیں جن سے لوگ بھی اور اللہ بھی راضی ہوتے ہیں۔ اور ایسے لوگوں کے لیے اللہ نے بہترین بات کی ہے۔ بڑی پیاری بات کہی ہے۔ '' اے اطمینان پانے والی روح ! اپنے رب کی طرف لوٹ چل۔ تو اس سے راضی وہ تجھ سے راضی۔ تو میرے بندوں میں شامل ہو۔ اور میری بہشت میں شامل ہوجا۔ (30-29-28-27) سبحان اللہ۔ اللہ ہمارے اوپر اتنی ہی مہربانی فرمائے اور ہمیں بھی اپنے ایسے ہی بندوں میں شامل کرے آمین ثم آمین۔ خلاصہ سورة الفجر سورت کی آخری چار آیات میں ان لوگوں کے لیے اللہ رب العزت نے بہت پیارے جملے بولے ہیں جو ایک بلند مقصد حیات کے حصول میں زندگیاں گزارتے ہیں۔ رسول اللہ ﷺ نے فرمایا '' اگر تم چاہتے ہو کہ اللہ تم سے محبت کرے تو دنیا کے بارے میں زہد اختیار کرو ' اگر تم چاہتے ہو کہ لوگ تم سے پیار کریں تو جو لوگوں کے پاس ہے اس سے سخی اور بےنیاز ہوجاؤ ''۔ (ابن ماجہ) بیشک اس زندگی کے لیے جدو جہد کرنا جس کا مقصدبہترین آسائشیں اور آرام ابدی حاصل کرنا ہو ' کسی جہاد سے ہرگز کم نہیں۔ لہٰذا ہمیشہ پھول کا شت کرو بجائے کانٹے بونے کے کیونکہ جو بوؤگے وہی کاٹو گے۔ اور پھر زندگی کی اصل خوشیاں حاصل کرنی ہوں تو صبر ' شکر اور قناعت کو زندگی کا اصول بنا لو۔ کیونکہ وقت اور حالات ہمیشہ بدلتے رہتے ہیں۔ صابر ' شاکر اور قانع اللہ کے دوستوں میں شامل ہیں۔ کسی نے کیا خوب کہا ہے '' چار چیزیں افضل ترین ہیں۔ غصہ میں درگزر ' تنہائی میں پارسائی ' تنگدستی میں سخاوت اور طاقت کے باوجود انکساری '' آج کا مسلمان دنیا میں ہر طرف سے مار کیوں کھا رہا ہے ؟ صرف اس لیے کہ وہ علم و محبت کی توانائیوں سے بالکل بےگانہ ہوچکا ہے۔ ورنہ تو مسلم کی شان یہ ہے۔ تری نگاہ میں ہے معجزات کی دنیا مری نگاہ میں ہے حادثات کی دنیا عجب نہیں کہ بدل دے اسے نگاہ تیری بلا رہی ہے تجھے ممکنات کی دنیا اب بھی وقت ہے کہ ہم اپنی راہوں کو درست کرلیں اور اپنا اصل مقصد حصول جنت بنا لیں جو کہ صرف اللہ اور اس کے رسول ﷺ کے بتائے ہوئے قوانین کو اپنا کر ہی مل سکتا ہے۔ ورنہ تو پھر ہمارا بھی وہی حال ہوگا جو ہم سے پہلے گزر گئی نافرمان قوموں کا ہوا۔ وہ قومیں ہر لحاظ سے ترقی یافتہ آسودہ حال اور مضبوط حیثیت رکھتی تھیں مگر تباہ و برباد کردی گئیں عذابوں کا نشانہ بنیں اور آخرت میں تو ان کا زیادہ ہی برا حال ہوگا۔ یہ صرف اس لیے ہوا اور ہوگا کہ وہ انتہائی نافرمان ' بدکردار اور ناشکر گزار قومیں تھیں ان کے حالات ہمارے لیے عبرت کا مقام پیش کر رہے ہیں۔ اللہ ہمیں اپنی حفاظت میں رکھے آمین۔ الحمد للہ کہ سورة الفجرمکمل ہوگئی۔