78. Surah An-Naba

بہت بڑی خبر (قیامت) تشریح : جب رسول اللہ ﷺ نے اللہ کی وحدانیت کا تصور لوگوں کو دیا اور ساتھ ہی قیامت کا ذکر کیا اور دوبارہ زندہ کرکے حساب لینے کا ذکر کیا تو لوگ حیران و پریشان ہوگئے اور بہت سے لوگ آپ کی ان باتوں کا مذاق اڑانے لگے اور دونوں باتوں کو ہنسی مذاق کا ذریعہ بنا لیا۔ کچھ نے تو جان بوجھ کر اور کچھ نے کم علمی کیوجہ سے۔ دونوں ہی باتیں ان کے لیے سوائے خیالی باتوں کے اور کچھ نہ تھا۔ تو وہ لوگ اٹھتے بیٹھتے طرح طرح سے مذاق اڑاتے کہ دیکھو محمد ﷺ (نعوذ باللہ) دیوانہ ہوگیا ہے کیسی انہونی باتیں کرتا ہے۔ اللہ تعالیٰ انہی دیوانے لوگوں کو خبر دے رہے ہیں کہ اگرچہ تم یقین نہیں کرتے مگر قیامت کا آنا ضروری ہے آکر رہے گی اور تم دوبارہ زندہ کیے جاؤ گے پھر اپنی آنکھوں سے یہ سارا معاملہ دیکھ لوگے ابھی نہیں مانتے تو نہ مانو، آج کا سائنس دان ہزاروں تجربات کرنے کے بعد اب قرآن پاک کی بتائی گئی اس حقیقت تک پہنچا ہے کہ ' یہ کائنات ہمیشہ کے لیے قائم نہیں رہ سکتی نہ یہ ہمیشہ سے چلی آرہی ہے۔ بلکہ اس کی عمر پندرہ بیس ارب سال ہے اور کسی دن یہ سب ختم ہوجائے گا۔ لیکن وہ کب ہوگا ؟ اس کا حساب لگانا مشکل ہے۔ اس کے بعد اسی ملبہ سے نئی تخلیق کی بنیاد پڑے گی۔ (از قیامت اور حیات بعد الموت مصنف سلطان بشیر محمود) مزید لکھتے ہیں : سائنس دان اب اس نتیجہ پر پہنچے ہیں کہ زمین آہستہ آہستہ پھیل رہی ہے اور پھر ایک مقررہ پھیلاؤ کے بعد سکڑنا شروع ہوجائے گی اور اندر کی طرف کھچاؤ کی طاقت بڑھتی چلی جائے گی اور یوں اجرام سماوی تیزی سے اندر کی طرف رش کریں گے اور پھر آپس میں ٹکراؤ کا سلسلہ تیز ہونے لگے گا اور پھر ایک وقت آئے گا کہ کائنات میں مزید بھنچ جانے کی گنجائش نہ رہے گی اور تب ایک انتہائی زبردست دھماکے کے ساتھ دوبارہ اچھلے گی اور یوں کائنات اپنی قیامت سے دوچارہوجائے گی۔ “ اس تحریر سے اور قرآن کی خبر سے ایک ہی پیغام ملتا ہے کہ قیامت کے نزدیک قدرتی آفات زیادہ ہونے لگیں گی۔ قیامت کے وقت صور پھونکا جائے گا یعنی زبر دست دھماکہ ہوگا۔ یہ سب اچانک ہوگا اور پھر ایک نئی کائنات کا آغاز ہوگا۔ یہ سب سائنس اب بتا رہی ہے جو قرآن پاک نے طویل عرصہ پہلے لوگوں کو بتا دیا تھا۔ اس وقت تو لوگ کفر و شرک میں ڈوبے ہوئے تھے اپنے آباؤ اجداد سے یہی کچھ سنتے آرہے تھے اور پھر بےعلم بھی تھے۔ اس کے باوجود بہت سے لوگوں نے اس خبر پر غوروفکر کیا اور ایمان لے آئے اور کچھ بد نصیب اس خبر سے انکار ہی کرتے رہے۔ مگر فی زمانہ اس خبر سے انکار کرنا سوائے ہٹ دھرمی کے اور کچھ نہیں۔ بہر حال لوگ انکار کریں یا اقرار کریں اللہ کے پروگرام میں کوئی فرق نہیں آتا۔ اس کے مقرر کئے گئے وقت پر قیامت ضرور آئے گی اور حساب کتاب ضرور ہوگا۔ جس طرح یہ کائنات حقیقت ہے اسی طرح دوبارہ زندہ ہونا بھی حقیقت ہے۔ اللہ کی نعمتیں بیشمار ہیں۔

اللّٰہ کی نعمتوں کا تذکرہ تشریح : رب رحمن و رحیم قیامت کے دن اور مرنے کے بعد زندہ کرنے کی بار بار وضاحت فرماتے ہیں کیونکہ وہ اپنے بندوں سے بےحد پیار کرتے ہیں۔ کیوں نہ ہو ہمیں اسی نے خود پیدا کیا ہے ہماری بہتری بھی اسی کے ہاتھ میں ہے اسی لیے تو خبردار کر رہا ہے کہ ہم وقت پر اس دن کی تیاری کرلیں بجائے سزا پانے کے اللہ کی طرف سے شاباش اور بہترین انعامات حاصل کریں۔ اسی سلسلے میں ہمیں اس دنیا کی ان تمام نعمتوں کی یاد دہانی کرواتا ہے جو اس نے ہمیں دے رکھی ہیں جو اس کی قدرت کا بہترین ثبوت ہیں مثلاً زمین کا ذکر کیا گیا ہے۔ یہ ذکر پہلے بھی کئی مرتبہ ہوچکا ہے۔ زمین انسانی زندگی کے لیے بنیادی حیثیت رکھتی ہے کیونکہ اسی کے متعدد اجزا سے ہماری پیدائش کا نطفہ تیار ہوتا ہے۔ اسی کے اوپر ہم بسیرا کرتے ہیں۔ اسی سے پیدا شدہ اناج اور پانی سے ہماری پرورش ہوتی ہے۔ یہ ایک ایسا سیارہ ہے جو پانی کی دولت سے مالا مال ہے جس کی وجہ سے یہ نظام شمسی میں خاص حیثیت رکھتا ہے ورنہ دوسرے کئی سیاروں کی طرح زمین بھی مردہ سیارہ ہوتی۔ پانی کی موجودگی زمین کے سنگھار کا باعث ہے اور انسان کے لیے زندگی کا بہترین تحفہ ہے۔ پھر اس زمین کی پختگی اور مزید بہتری کے لیے اس پر بڑے بڑے پہاڑ میخوں کی طرح گاڑ دئیے۔ ماہرین کا خیال ہے کہ '' زمین کے لہریوں کو پہاڑوں کی بنیادیں کہنا مناسب ہے کیونکہ وہ اندازاً ایک میل سے تقریباً 10 میل کی گہرائی تک گئی ہوئی ہیں۔ قشر ارض کی مضبوطی ان لہریوں کی وجہ سے ہی ہے ''۔ پھر انسان کی پیدائش کا بندو بست یوں کیا کہ عورت و مرد کا جوڑا بنایا۔ کیونکہ عورت کے بیضہ اور مرد کے خلیہ کے ملاپ سے انسان کی تخلیق کا بندوبست اللہ نے کیا ہے۔ یہ عجیب و غریب اور حیران کن طریقہء تخلیق موجودہ ترقی یافتہ دور میں کافی حد تک معلوم کیا جا چکا ہے۔ یہ بھی قرآن کی آسمانی کتاب ہونے کا ثبوت ہے کیونکہ یہ پورا طریقہ کار اس وقت بڑی تفصیل سے بتایا گیا ہے۔ جب دنیا کے پاس نہ تو ایسے خوردبینی آلات تھے اور نہ ہی تحقیقاتی علوم و فنون تھے کہ جن کی مدد سے وہ ان باریک ترین بیضہ اور خلیہ کو دیکھ سکتے۔ جان لینا تو بعد کی بات ہے۔ جیسا کہ ماہرین نے بتایا ہے کہ افزائش نسل کا یہ خلیہ لمبوترا ہوتا ہے اور اس کے ابعاد کو ایک ملی میٹر کے دس ہزارویں حصے میں ناپا گیا ہے۔ جو انسانی آنکھ بغیر خورد بین کے دیکھ نہیں سکتی۔ اس لاجواب طریقہ تخلیق کو غور سے سوچیں تو اللہ ہمارے سامنے موجود دکھائی دیتا ہے کیونکہ یہ مسئلہ کسی غیر اللہ کے بس کی بات نہیں۔ جوڑوں کا تصور اسی لیے دیا گیا ہے کہ رب الاعلی نے اپنی تمام تخلیقات کی بنیاد جوڑوں سے ہی کی ہے۔ کیا حیوان، انسان ' جمادات یا نباتات ہوں۔ سب جوڑوں میں ہی موجود ہیں۔ اور یہ اللہ کی وحدانیت کا بھی ایک ثبوت ہے کہ وہ مالک خالق بالکل ایک ہے نہ اس کی پیدائش کسی سے ہوئی اور نہ کوئی اس سے پیدا ہوا۔ بس وہ تھا، ہے اور رہے گا۔ اس کی محبت انسان کے لیے اللہ کے ان انتظامات سے بھی ظاہر ہوتی ہے جو اس نے بندوں کی سہولیات کے لیے اس دنیا میں کر رکھے ہیں۔ مثلاً آرام کے لیے پر سکون رات بنا دی کہ نیند کے ذریعہ اعصابی اور روحانی سکون حاصل کر کے اگلے دن کے کام کاج اور محنت مزدوری کے لیے تازہ دم ہو سکیں۔ اس طرح مضبوط اور فائدوں سے بھرپور سات آسمانوں کی بہترین چھتیں ہمارے لیے بنا دیں۔ یہ چھتیں اپنی بناوٹ میں عجیب و غریب ہیں۔ نہ تو ان کو ستونوں کا سہارا دیا گیا ہے اور نہ ہی کسی اور چیز سے ان کو تھاما گیا ہے بلکہ ایک غیر محسوس طاقت نے ان کو یوں تھام رکھا ہے کہ نہ تو وہ ایک دوسرے پر گرتے ہیں اور نہ ہی زمین کے اوپر آگرتے ہیں۔ کیا یہ اس خدائے لم یزل کی موجودگی کا اعلان نہیں کرتے ؟ ہے کوئی ایسا ماہر فلکیات سائنس دان جو ان کو بنانا تو بڑی دور کی بات ہے صرف ان کی بناوٹ ' کارکردگی اور توازن کو ہی پوری طرح جان سکے ؟ کوئی نہیں متعلقہ علوم کے ماہرین دن رات تحقیقات میں لگے رہتے ہیں مگر حتمی فیصلہ ان کے بس کی بات نہیں۔ آخر میں وہ بھی اسی نتیجہ پر پہنچتے ہیں جو حقائق قرآن میں بتا دئیے گئے ہیں اور وہ حقائق ہی سچ ہیں کبھی تبدیل نہ ہونے والے۔ کیا یہ اللہ کی موجودگی قرآن و رسول ﷺ کی سچائی اور اللہ کی دی گئی خبروں کی سچائی کے لیے کافی اور مستحکم ثبوت نہیں ہیں ؟ کیوں نہیں بیشک اللہ کا یہ فرمان باقی تمام فرمانوں کی طرح بالکل سچ ہے کہ حساب کا دن ضرور آئے گا لوگوں کو دوبارہ زندہ کر کے اللہ کے حضور ضرور جمع ہونا ہوگا۔ اسی طرح اس سورج کا ذکر کیا گیا ہے۔ جو اپنے اندرونی دھماکوں سے شدید گرمی اور روشنی پیدا کرتا رہتا ہے۔ ماہرین نے اس کی خصوصیت کچھ یوں بیان کی ہے۔ ہائیڈروجن کے جو ہر ٹوٹ پھوٹ کر ہیلم کے جوہروں میں تبدیل ہورہے ہیں۔ کہا جاسکتا ہے کہ اس قسم کے ستاروں کے ابتدائی مرحلہ کے لیے مجموعی طور پر دس ارب سال قرار دی جاتی ہے۔ اس کے موجودہ مرحلہ کو اختتام تک پہنچنے کے لیے مزید 5 ارب سال لگنے چاہییں۔ (از ڈاکٹر موریس بوکائے) یہ تو سائنس کا اندازہ ہے جو غلط بھی ہوسکتا ہے اصلیت تو خالق ومالک اللہ ہی جانتا ہے۔ ہمیں ایک عام عقل رکھنے والے انسانوں کو یہ تو پکی طرح معلوم ہے کہ سورج کے بیشمار فائدے ہیں ہماری زمین کے اور ہمارے بہت سے کام اسی کے ذریعہ چلتے ہیں۔ مثلاً دن کے وقت دنیا کو روشن کردینا ایسے کہ ہم لاکھوں روشنیوں سے بھی ایسی روشنی پیدا نہ کرسکیں اور پھر موسم کو مناسب رکھنا۔ پھلوں ' سبزیوں اور فصلوں کو اپنی مناسب گرمی سے پکا دینا۔ پانی کو اپنی تپش سے بھاپ بنا کر بلندیوں تک لے جانا تاکہ وہ بھر پوربادلوں کی شکل اختیار کرلیں اور پھر ان بادلوں کو ہوا کے ذریعے دور دراز علاقوں میں انتہائی موزوں ترین پروگرام کے تحت یوں زمین پر برسا دینا کہ کھیتی باڑی اور پینے کے لیے مستقل ضرورت کے مطابق خلقت کو ٹھنڈا میٹھا تازہ پانی ملتا رہے۔ سبحان اللہ۔ ہے کوئی ایسا ماہر انجنئیر سائنس دان جو اس پورے پر وجیکٹ کا ایک معمولی حصہ بھی بنا سکے ؟ کوئی نہیں۔ نہ ہوا ' نہ ہے اور نہ ہوگا۔ یہ سب کمالات صرف اس رحمن و رحیم ' خالق ومالک ' غفور ورحیم اور جبار و قھار کے ہی ہیں جس نے مرنے کے بعد زندہ کئے جانے کی پکی اور سچی خبر ہمیں انسانوں کو دی ہے۔ یہ سب کچھ ہمارے سامنے ہر وقت موجود ہے۔ پھر کونسی چیز ہمیں اللہ کے احکام کو ماننے سے روک رہی ہے ؟ غوروفکر کا مقام ہے ہماری عقلیں اتنی بھی کمزور اور بےکار نہیں کہ ہم ان تمام کھلی باتوں سے اللہ کو پہچان نہ سکیں۔ غور سے سنئے۔

قیامت کے دن زندہ ہونے کا ثبوت تشریح : پچھلی آیات اور ان آیات میں قرآن پاک فزکس ' اسٹروفزکس ' علم حیاتیات علم روحانیت اور کائنات سے متعلقہ تمام علوم کی طرف بڑے واضح اشارات کرتے ہوئے قیامت ' آخرت ' دوبارہ زندہ کئے جانے کی حقیقت کے سچ اور ضروری ہونے کا اعلان کرتا ہے اور ان تمام لوگوں کے برے انجام کا بھی بڑی وضاحت سے اعلان کرتا ہے جنہوں نے ہمیشہ ان حقیقتوں کے سچ ہونے سے انکار کیا آیت 17 سے 30 تک بڑے آسان ' عام فہم ' اور واضح الفاظ میں سب کچھ بتا دیا گیا ہے اور پھر یہ وضاحت بھی کردی گئی ہے کہ جس طرح اس دنیا کا نظام بڑی نفاست ' حفاظت اور بغیر غلطی کے چل رہا ہے اسی طرح آخرت کا وقت اور بعد کے تمام معاملات بغیر کسی غلطی یا مشکل کے پورے ہوتے چلے جائیں گے کیونکہ اللہ تعالیٰ کا نظام کوئی اٹکل پچو ناقص یا اتفاقات پر مبنی غیر یقینی نظام نہیں ہے۔ بلکہ اللہ تعالیٰ فرماتا ہے '' اور ہم نے ہر چیز کو لکھ کر ضبط کر رکھا ہے ''۔ (آیت 29) یقینی طور پر فیصلے کا دن آئے گا۔ اور یقینی طور پر بغیر کسی بےانصافی کے احتمال کے منکرین آخرت کو بتایا گیا عذاب ملے گا۔ اس میں ہرگز کسی شک و شبہ کی گنجائش نہیں۔ اور پھر نیک مومنین کا ذکر یوں کیا جاتا ہے۔ ملاحظہ ہو۔

اچھے لوگوں کی آؤ بھگت کا اعلان تشریح : دیکھا آپ نے ! اللہ کتنا مہربان ' بہترین اجر دینے والا اور انصاف کرنے والا ہے۔ اللہ کے اس خوبصورت اور بہترین اعلان کے بعد کون چاہے گا کہ وہ اپنے اس مہربان مالک و خالق کا بندہ نہ بنے۔ میں بندہ ہوں تیرا کہ تیرے علاوہ کہیں بھی کوئی بندہ پرور نہیں ہے محمد منظور الحق

قیامت کا منظر تشریح : یہاں ایک اور فضائی راز کی طرف اشارہ کیا گیا ہے۔ جس کو سائنس دان اچھی طرح واضح کرنے میں کامیاب نہیں ہوئے۔ '' آسمانوں اور زمین اور جو ان دونوں میں ہے ''۔ (آیات 27) جناب سلطان بشیر محمود صاحب اس کی وضاحت سائنسی نقطہ نگاہ سے کچھ یوں کرتے ہیں۔ '' ابھی تک اس طرف جو پیش رفت ہوئی ہے ان میں تازہ ترین سائنسی انکشافات یہ ہیں کہ فضابہت چھوٹے چھوٹے تخموں سے اس طرح بھری پڑی ہے جیسے زمین پر کسی بیج کا چھینٹا دیا جاتا ہے۔ یہ فضائی جراثیم فضا میں ایک مقام سے دوسرے تک تابکاری کے دباؤ سے حرکت کرتے رہتے ہیں۔ وہ اتنے سخت جان ہیں کہ فضا کی سردی اور دباؤ کو برداشت کرسکتے ہیں۔ ان کی اس سخت کو شی کو دیکھتے ہوئے کہا جاسکتا ہے کہ اگر وہ زمین پر آجائیں تو ان کو تباہ کرنا آسان نہیں ہوگا ''۔ (از قیامت حیات بعدا لموت) یہ راز مادہ غیب کے بارے میں تاحال متنازع معاملہ ہے واللہ اعلم۔ آیات 38 تا 40 تک پھر حساب کے دن کا اعلان واضح الفاظ میں کیا گیا ہے۔ جس کی مرضی ہے کہ اس کو مانے اور جس کی مرضی ہے نہ مانے بہرحال اس کی سختی کا اظہار یوں کیا گیا ہے کہ '' کافر کہے گا کہ اے کاش میں مٹی ہوتا ''۔ (آیت 40) حشر کے میدان میں اللہ تعالیٰ کی ہیبت اور امتحان کا خوف اس قدر زیادہ ہوگا کہ کوئی شخص بول نہ سکے گا دنیا کی طرح کسی قسم کی سفارش رشوت یا طرف داری کی ہمت کسی کو نہ ہوگی ہاں البتہ صرف ان قابل قدر ہستیوں کو بولنے کی اجازت ہوگی جن کو بولنے کی اللہ کی طرف سے اجازت ہوگی۔ اس بات کو ہم احادیث کی مدد سے واضح کرتے ہیں۔ حضور ﷺ نے فرمایا۔ '' ہر نبی کی ایک دعا خصوصی طور پر قبول ہوتی ہے۔ چناچہ ہر پیغمبر نے اس دعا میں جلدی کرلی ہے۔ مگر میں نے قیامت کے روز اپنی امت کی شفاعت کے لیے اس دعا کو بچا رکھا ہے۔ میری امت میں سے جو شخص غیر مشرک مرے گا ' اللہ نے چاہا تو اس دعا کا فائدہ اسے پہنچے گا ''۔ (اللولووالمرجان) پھر انبیاء، علماء اور شہداء کی سفارش کا ذکر حدیث میں اس طرح کیا گیا ہے۔ حضور ﷺ نے فرمایا قیامت کے دن انبیاء ' علماء اور شہداء (اللہ کے حکم سے) سفارش کریں گے ''۔ (ابن ماجہ) حدیث میں یہ بھی آیا ہے کہ حضور ﷺ نے فرمایا '' قرآن پاک کی تلاوت کرتے رہو ' اس لیے کہ قیامت کے روز یہ بھی ان کی سفارش کرے گا جو اس کی تلاوت کرتے تھے ''۔ (مسلم) پھر یہ بھی شرط ہے کہ صرف ان لوگوں کے لیے سفارش کی اجازت ہوگی یا سفارش قبول کی جائے گی جن سے اللہ تعالیٰ راضی ہوگا۔ رسول اللہ ﷺ نے فرمایا۔ وہ کسی کی سفارش نہیں کرسکیں گے مگر ہاں اس شخص کی جس سے اللہ راضی ہو۔ (سورۃ النجم) پھر فرمایا : سفارش تو تمام تر اللہ کے اختیار میں ہے کہہ دو ''۔ (زمر : 44) '' شفاعت کا حق حاصل کرنے والوں کو تین اعمال پر پابندی کرنی چاہیے۔ 1 توحید کا اقرار شرک کا انکار 2 نمازوں کا پابند ہونا 3 درود شریف کی کثرت یعنی اکثر پڑھتے رہنا '' (از مومن کے عقائد) اُمید ہے کہ ان لوگوں کو سمجھ آگئی ہوگی جو یہ کہتے ہیں کہ '' دیکھا جائے گا ''۔ اور کچھ یہ کہتے ہیں کہ '' ہم تو رسول پاک ﷺ کے امتی ہیں۔ ہمیں اعمال کی کیا ضرورت ہے ''۔ اللہ سے یہ دعا کرتے رہنا چاہیے۔ اے اللہ ! اپنے پیغمبر کی شفاعت کی سعادت مجھے نصیب فرما آمین۔ آخر میں بڑی وضاحت سے اعلان کردیا گیا ہے کہ حساب کا دن ضرور آئے گا بدلہ ضرورملے گا اور حساب کا دن اس قدر تکلیف دہ ہوگا کہ کافر کہے گا اے کاش میں مٹی ہوتا۔ (آیت 40) اللہ جل جلالہ اس دن کی سختی اور مصیبت سے اپنی امان میں رکھے اور پیغمبر ﷺ کی شفاعت عنایت کرے۔ آمین خلاصہ سورة النبا جیسا کہ اس سورة مبارکہ کے نام سے ہی ظاہر ہو رہا ہے '' خبر ''۔ کس چیز کی خبر ! ایک ایسی بات کی '' خبر '' جو ہمارے مشاہدے اور تجربے سے باہر ہے۔ جس کو ہم نبی ﷺ کے ذریعے سنتے قرآن میں پڑھتے ہیں۔ اور یہ دونوں ذریعے قابل اعتماد ہیں۔ کیونکہ اللہ نے ہمیں پیدا کیا کا ئنات بنائی وہ ہمیں بتا رہا ہے کہ یہ کائنات ایک دن ضرور ختم کردی جائے گی اور تمہیں بھی ختم کردیا جائے گا مگر دونوں کا ختم ہونا اس بات کی دلیل ہے کہ تمہارا یہاں آنا اس دنیا کی زندگی کی شروعات ہیں اور مرجانا دوسری دنیا میں نئی زندگی حاصل کرنے کی شروعات ہوں گی۔ اسی طرح کائنات کا وجود میں آنا اور پھر ختم ہونا بھی اس بات کی دلیل ہے کہ اس کائنات کا اختتام دوسری کائنات کا وجود ہوگا۔ جس طرح تم کچھ نہ تھے انتہائی حقیر ترین نطفہ سے انسان بنادئیے گئے اسی طرح حساب کے دن تم لوگ دوبارہ ضرور زندہ کھڑے کر دئیے جاؤ گے اور اس زندگی کے اعمال نامے کے ساتھ تاکہ تمہیں آخرت کی ابدی زندگی میں انعام یا سزا دی جائے۔ دوسرا ذریعہ ہے پیغمبر آخر الزماں محمد ﷺ وہ اللہ کے انتہائی برگزیدہ نبی ہیں۔ اور ان کو رب تعالیٰ نے جنت و دوزخ کا مشاہدہ اس زندگی میں کروا دیا تھا۔ ان کا تو صرف کہہ دینا ہی مسلمان کے لیے قابل اعتبار ہے جب کہ انہوں نے آخرت کے یقین کرنے کے لیے قرآنی آیات بار بار کثرت سے لوگوں کو بتا دی ہیں تو اب شک و شبہ کی ہرگز کوئی گنجائش نہیں رہتی۔ یقین کرنے والے متقین کے بارے میں اللہ فرماتا ہے۔ '' اور وہ آخرت پر یقین رکھتے ہیں ''۔ (البقرہ : 4) پھر فرمایا۔ '' اور ان میں سے کوئی کہتا ہے۔ اے ہمارے رب ! ہمیں دنیا میں بھی بھلائی عطا کر اور آخرت میں بھی۔ اور آگ کے عذاب سے ہمیں بچا ''۔ (البقرۃ 201) دیکھا جائے تو ہر بندے کی زندگی کا مقصد متعین کردیا گیا ہے۔ یعنی '' امتحان ''۔ اس پوری زندگی کا امتحان۔ یہی تو مقصد ہے انسان اور کائنات کی پیدائش کا۔ بھلا یہ سب کچھ یونہی بےمقصد کھیل تماشہ تو نہیں ہوسکتا۔ یہ سب کچھ بامقصد ہے۔ تو ہم میں سے ہر شخص کو چاہیے کہ زندگی میں کسی بھی ذمہ داری کے حامل ہوں پورے خلوص نیک نیتی اور اللہ و رسول ﷺ کی حدود میں رہ کر اپنے فرائض ادا کریں۔ چاہے آپ ماں ہیں۔ باپ افسر ' ٹیچر ' لیڈر ' طالبعلم ' ڈاکٹر ' انجنئیر ' سائنسدان ہیں۔ غرض کچھ بھی ہیں اپنے فرائض پوری ایمانداری محنت اور خوف خدا دل میں رکھ کر کریں۔ تو آپ دیکھ لیں گے کہ آپ ' آپ کا متعلقہ شعبہ ' قوم اور آپ کا ملک کیسے ترقی کرنے لگے گا۔ یہ انعام تو ہوگا اس دنیا میں۔ اور بڑا انعام جس کا تصور ہی بےچین کردیتا ہے۔ اور جو رب اعلیٰ ' مالک الملک ' غفور رّحیم اور قادر مطلق کی طرف سے دوبارہ زندہ ہونے پر بہترین اعمال کے صلہ میں دیا جائے گا۔ وہ ہے '' جنت ''۔ جس کی تعریف قرآن میں جگہ جگہ کی گئی ہے۔ القرآن۔ '' اور جیسی چیز کو تمہارا جی چاہے ' جنت میں تمہارے لیے موجود ہے۔ اور جو مانگو وہاں موجود ہوگا ''۔ (فصلت : 31) حدیث میں یوں آیا ہے۔ رسول اللہ ﷺ نے فرمایا کہ '' اور لمبے لمبے سائے اور بہتے ہوئے پانی ' بہت سے میوے ہوں گے جو نہ کبھی ختم ہوں گے اور نہ کوئی ان سے روکے گا اور اونچے فرش ہوں گے ''۔ (بخاری ' مسلم ' ترمذی) یہ تو کچھ بھی نہیں قرآن پڑھو تو دیکھو جنت کیسی شاندار چیز اللہ نے بنائی ہے۔ شرط یہ ہے۔ '' کہہ دو اس دنیا کی متاع بہت قلیل ہے اور جو لوگ تقویٰ اختیار کریں گے ان کے لیے آخرت میں اس سے کہیں بڑھ کر ہے اور تمہارے ساتھ ذرا بھی حق تلفی نہ ہوگی (النساء : 77) (الحمد للہ سورة النبا مکمل ہوگئی)