113. Surah Al-Falaq

(1) اے پیغمبر آپ یوں کہئے کہ میں صبح کے پروردگار اور مالک یعنی اللہ تعالیٰ کی پناہ لیتا ہوں۔ فلق پھٹنے والی چیز کو کہتے ہیں مفسرین کے بہت سے اقوال ہیں ہم نے راجح قول اختیار کرلیا ہے کہ یہاں صبح کی پو پھٹنا مراد ہے چونکہ اللہ تعالیٰ ہر چیز کو پھاڑنے والا ہے۔ ان اللہ فالق الحب والنوی۔ گٹھلی کا پھٹنا، دانے کا پھٹنا، زمین کا پھٹنا ، پہاڑوں کا پھٹنا سب اسی کے حکم سے ہوتا ہے اس لئے ارشاد ہوا کہ آپ رب الفلق سے پناہ مانگیے اور دوسروں کو بھی تعلی دیجئے تاکہ ہر مسلمان توکل کا عادی ہو۔

(2) ہراس چیز کے شر سے جسے اس نے پیدا کیا۔ یعنی اس کی تمام مخلوق کی برائی سے خواہ وہ انسان کی برائی ہو یا جن کی ہو یا کسی سوزی درندے اور وحشی جانور کا شر ہو سانپ بچھو اور دوسرے موذی جانوروں کے شر سے اللہ کی پناہ مانگتا ہوں۔

(3) اور اندھیری رات کے شر سے جب رات کا اندھیرا چھا جائے۔ تاریکی کا شر اور اندھیرے کی بدی ظاہر ہے ابن عباس ؓ نے کہا کہ غاسق رات ہے جب وہ مشرق سے اپنے اندھیرے کو بڑھاتی ہوئی آئے۔ حضرت عائشہ ؓ فرماتی ہیں کہ حضور ﷺ نے ایک دفعہ چاند کو دیکھ کر فرمایا۔ اے عائشہ ؓ اس سے پناہ مانگ اللہ تعالیٰ کی یہی وہ غاسق ہے جب گہن کی وجہ سے غائب ہوجائے یعنی پورا چاند گہن میں آجائے رات میں چونکہ آفات پھیلتی ہے اس لئے رات کے اندھیرے سے پناہ مانگنے کا حکم دیا ہے ہوسکتا ہے کہ اس تاریکی سے ثریا کا غائب ہونا ہو کیونکہ ثریا کے غائب ہونے کے بعد بہت سے امراض پیدا ہوتے ہیں۔ واللہ اعلم حضرت شاہ صاحب (رح) فرماتے ہیں یعنی رات کا اندھیرا اور چاند کا گہن اس میں آگئیں سب تاریکیاں ظاہر اور باطن کی اور تنگدستی پریشانی گمراہی۔

(4) اور ان جادوگرنیوں کے شر سے پناہ مانگتا ہوں جو منتر پڑھ پڑھ کر گرہوں میں پھونک مارتی ہیں۔ یعنی وہ جادوگرنیاں جو کلمات کفریہ اور منتر پڑھ کر تانت میں یا بال میں گرہیں لگاتی ہیں اور ان میں پھونکیں مارتی ہیں۔ شاید اس سے مراد لبیدبن اعظم کی لڑکیاں ہوں یا عام جادوگرنیاں مراد ہوں کہ ان کے شر سے پناہ مانگتا ہوں

(5) اور ہر حسد کرنے والے کے شر سے جب وہ حسد کرے - حسد کا مطلب یہ ہے کہ حاسد زوال نعمت کا خواہشمند ہوتا ہے اور یہ چاہتا ہے کہ محسود کی نعمت زائل ہوجائے اس کے شر سے پناہ مانگتا ہوں جب یہ حاسد اپنے حسد کو ضبط نہ کرسکے اور اپنے حسد کو ظاہر کردے اور ہونسنے والا ہون سے ۔ حضرت شاہ صاحب (رح) فرماتے ہیں کہ اس وقت ہونسنے والے کی ٹوک لگ جاتی ہے۔ بہرحال حاسد کا شر بہت خطرناک ہے اس لئے اس کے شر سے بھی پناہ مانگتا ہوں اس سورت میں حق تعالیٰ کا ایک وصف۔ رب الفلق مذکور ہے اور جن سے پناہ مانگی گئی ہے وہ چار چیزیں ہیں تمام مخلوق کی برائی اور خاص طور پر رات کے اندھیرے کی برائی جادوگرنیوں کی برائی کے شر سے اور حاسد جب کہ وہ حسدکا اظہار کرے۔ تم تفسیر سورة الفلق