قرآن کی پیروی کرنے کا حکم
وعن أبي هريرة رضي الله عنه قال : قال رسول الله صلى الله عليه و سلم : أعربوا القرآن واتبعوا غرائبه وغرائبه فرائضه وحدوده . رواه البيهقي في شعب الإيمان
حضرت ابوہریرہ ؓ راوی ہیں کہ رسول کریم ﷺ نے فرمایا قرآن کے معانی بیان کرو اور اس کے غرائب کی پیروی کرو اس کے غرائب سے اس کے فرائض اور اس کی حدود ہیں۔ تشریح اس بات کی وضاحت کی گئی ہے کہ قرآن کے غرائب کیا ہیں؟ چناچہ فرمایا کہ قرآن کے فرائض اور اس کی حدود، قرآن کے غرائب ہیں اب اس بات کو بھی سمجھ لیجئے کہ فرائض اور حدود سے مراد ہیں منہیات! یعنی وہ چیزیں جن کو کرنے سے منع فرمایا گیا ہے، حاصل یہ کہ قرآن کی اطاعت و پیروی کا مطلب یہ ہے کہ قرآن نے جن چیزوں کو کرنے کا حکم دیا ہے ان کو کیا جائے اور جن چیزوں سے روکا ہے ان سے اجتناب کیا جائے۔