113. Surah Al-Falaq

1 : قُلْ اَعُوْذُ بِرَبِّ الْفَلَقِ (آپ کہیے میں صبح کے مالک کی پناہ لیتا ہوں) الفلقؔ صبح یا مخلوق یا جہنم کی وادی کا نام ہے۔ یا جہنم کے ایک کنوئیں کا نام ہے۔

2 : مِنْ شَرِّمَا خَلَقَ (تمام مخلوقات کے شر سے) ماخلق سے آگ یا شیطان مراد ہے۔ نحو : ما موصولہ اور ضمیر عائد محذوف ہے ما مصدریہ خلق بمعنی مخلوق۔ قراءت : ابوحنیفہ (رح) نے من شرکو تنوین سے پڑھا اس صورت میں ما فعل کے ساتھ مل کر تاویل مصدر سے موضع جر میں شرؔ سے بدل بنے گا تقدیر کلام یہ ہوگی : من شرخلقہٖ ای من خلق شر بری مخلوق سے۔ یا مازائدہ ہے۔

3 : وَمِنْ شَرِّ غَاسِقٍ اِذَا وَقَبَ (اور اندھیری رات کے شر سے جب وہ رات آجائے) الغاسقؔ: رات کو کہتے ہیں جبکہ اس کا اندھیرا گہرا ہوجائے۔ وقوب : اندھیرے کا ہر چیز میں داخل ہونا۔ قول عائشہ ؓ : رسول اللہ ﷺ نے میرا ہاتھ پکڑکر چاند کی طرف اشارہ فرمایا اور ارشاد فرمایا تو اللہ تعالیٰ کی پناہ مانگ اس کے شر سے فانہ الغاسق اذا وقب۔ یہی تو وہ اندھیرے والا ہے جب اندھیر ہوجائے۔ چاندؔ کا اندھیر ہونا گرہن کی وجہ سے سیاہ ہونا ہے۔ (رواہ الترمذی : 3366)

4 : وَمِنْ شَرِّ النَّفّٰثٰتِ فِی الْعُقَدِ (اور گرہوں پر پڑھ پڑھ کر پھونکنے والیوں کے شر سے) النفاثات۔ نمبر 1۔ عورتیں، نمبر 2۔ نفوس۔ نمبر 3۔ ساحروں کی جماعتیں جو دھاگوں پر پھونک مار کر گرہ لگاتی ہیں اور اس سے تعویذگنڈا کرتی ہیں۔ النفثؔ ایسی پھونک جس میں تھوک کی ملاوٹ نہ ہو۔ ردِ معتزلہ : اس میں معتزلہ کی تردید ہے کہ وہ کہتے ہیں کہ سحر کا کوئی وجود نہیں اور اس کا اثر بھی ظاہر نہیں ہوتا۔

5 : وَ مِنْ شَرِّحَاسِدٍ اِذَا حَسَدَ (اور حسد کرنے والے کے شر سے جب وہ حسد کرنے لگے) یعنی جب وہ اپنا حسد ظاہر کرے اور اس کے مقتضی کے مطابق عمل کرے کیونکہ جب وہ ظاہر نہیں ہوگا تو پھر اس کا ضرر محسود پر مرتب نہ ہوگا۔ بلکہ وہ خود اس کے اپنے نفس کیلئے نقصان اور غم کا باعث بنے گا۔ حسد دوسرے کے ہاں کسی بھلائی کو دیکھ کر اس پر افسوس اور تمنائے زوال کرنا۔ نکتہ : ماخلق کے شر سے استعاذہ کے بعد ان اشیاء سے استعاذہ اس بات کو ظاہر کر رہا ہے کہ ان کا شر بہت شدید ہے اور سب سے آخری شر جس سے استعاذہ کیا گیا وہ حسد ہے۔ اس سے بتلایا کہ یہ شر میں ان سب سے اعظم تر ہے۔ یہ وہ پہلا گناہ ہے جس کے ذریعہ ابلیس نے آسمانوں میں اللہ تعالیٰ کی نافرمانی کی اور زمین میں سب سے پہلے قابیل سے ظاہر ہونے والا گناہ ہے۔ بعض مستعاذ منہ کو معرفہ اور بعض کو نکرہ لایا گیا کیونکہ تمام پھونکیں مارنے والیاں شریروں کی پارٹیاں ہیں اسی لئے النفاثات کو معرفہ لائے اور غاسقؔ کو نکرہ ذکر کیا کیونکہ ہر غاسق میں شر نہیں۔ بعض میں شر ہوتا ہے اور وہ بھی ایک دوسرے کے مقابلہ میں کم زیادہ ہوتا ہے۔ اسی طرح ہر حاسد نقصان پہنچانے والا نہیں۔ بعض حسد پسندیدہ ہیں جیسا بھلائی کے کاموں میں رشک کرنا۔ اور ایک دوسرے پر سبقت لے جانا۔