108. Surah Al-Kawthar

2:۔ ” انا اعطینک “ الکوثر بروزن فوعل، جو چیز عدد و قدر اور منزلت و منفعت میں کثیر ہو اسے کوثر کہا جاتا ہے۔ العرب تسمی کل شیئ کثیر فی العدد والقدر والخطر کو ثرا (قرطبی ج 20 ص 127) ۔ الکوثر سے مراد کے بارے میں مفسرین کے تقریبان پندرہ اقوال ہیں۔ سب سے زیادہ معروف قول دو ہیں۔ اول یہ کہ اس سے مراد حوض کوثر ہے جو رسول اللہ ﷺ کو عطا ہوگا اور آپ اس سے اپنی امت کو سیراب کریں گے اس کا پانی دودھ سے زیادہ سفید اور شہد سے زیادہ شیریں ہوگا۔ قیامت کے دن آپ کو حوض کوثر کا ملنا متواترات میں سے ہے۔ دوم یہ کہ اس سے مراد قرآن مجید ہے جو دین و دنیا کا کوثر ہے اور دین و دنیا کی خیر کثیر کا سر چشمہ ہے یا اس سے ہر وہ خیر و برکت اور ہر وہ نعمت مراد ہے جو اللہ تعالیٰ نے آنحضرت ﷺ کو عطاء فرمائی ہو۔ یہ قول حضرت عبداللہ بن عباس امام المفسرین سے منقول ہے۔ اور یہ قول حوض کوثر اور قرآن کو بطریق اولی شامل ہے۔ القول الخامس عشر ان المراد من الکوثر جمیع نعم اللہ علی محمد (علیہ السلام) وھو المنقول عن ابن عباس لان لفظ الکوثر یتنال الکثرۃ الکثیرۃ فلیس حمل الایۃ علی بعض ھذہ النعم اولی من حملہا علی الباقی فوجب حملہا علی الکل (کبیر) ۔ یہ سورت چونکہ مکیہ ہے اور اس کے نزول کے وقت ابھی نہ نزول قرآن کی تکمیل ہوئی تھی اور نہ بالعفعل حوض کوثر آپ کو ملا تھا اور نہ ابھی ہر نعمت اور خیر و برکت کا نزول ہی مکمل ہوا تھا اس لیے اعطیناک، حکمنا لک بالاعطاء پر محمول ہے۔

3:۔ ” فصل “ یہ ماقبل پر مرتب ہے۔ چونکہ ہم نے آپ کو الکوثر عطا کیا ہے اس لیے آپ بطور شکر نعمت محض ہماری رضا جوئی اور خوشنودی کے لیے نماز پڑھیں اور حاجات و مصائب میں صرف مجھے پکاریں اور میرے سوا کسی اور کو نہ پکاریں۔ یہ شرک اعتقادی کی نفی کی طرف اشارہ ہے ” وانحر “ ای لربک۔ یہ شرک فعلی کی نفی کی طرف اشارہ ہے۔ یعنی صرف اللہ تعالیٰ کی خوشنودی کیلئے نذر و نیاز دینا اور اسی کے نام کی قربانی کرنا غیر اللہ کے نام کی نہ کرنا۔

4:۔ ” ان شانئک “ ایک دفعہ ایک مشرک رسول اللہ ﷺ سے باتیں کر رہا تھا جب آپ سے جدا ہوا تو دوسرے مشرکوں نے پوچھا کس سے باتیں کر رہا تھا ؟ بولا، اس ابتر کے ساتھ، اس کا اشارہ رسول اللہ ﷺ کی طرف تھا۔ کیونکہ آپ کی نرینہ اولاد زندہ نہیں تھی۔ اس پر یہ آیت نزل ہوئی۔ اللہ تعالیٰ نے فرمایا آپ مقطوع النسل نہیں ہیں۔ بلکہ یہ کفار اس صفت سے موصوف ہیں اور آپ کی روحانی اور جسمانی اولاد قیامت تک دنیا میں موجود رہے گی نیز آپ یہ مسئلہ بیان کریں گے تو اللہ تعالیٰ آپ کے دشمنوں کو تباہ کردے گا۔